ഒരു സിനിമാപരസ്യം പോലും ഭയക്കുന്നെങ്കില്‍ നിങ്ങള്‍ക്ക് എന്തോ ബാധിച്ചിരിക്കുന്നു; പോസ്റ്റര്‍ വിവാദത്തിൽ പ്രതികരണവുമായി ബെന്യാമിന്‍

കേരളത്തിലെ റോഡുകളുടെ അവസ്ഥ പറഞ്ഞ് കുഞ്ചാക്കോ ബോബന്‍ നായകനായ പുതിയ സിനിമ ‘ന്നാ താന്‍ കേസ് കൊട്‘ എന്ന ചിത്രത്തിന്റെ റിലീസ് പോസ്റ്റര്‍ അണിയറ പ്രവര്‍ത്തകര്‍ പുറത്തിറക്കിയിരുന്നു. ഇതിന് പിന്നാലെ പോസ്റ്റര്‍ വിവാദങ്ങളില്‍ ഇടം പിടിച്ചു.

ഇപ്പോളിതാ, വിഷയത്തില്‍ പ്രതികരണവുമായി എത്തിയിരിക്കുകയാണ് എഴുത്തുകാരന്‍ ബെന്യാമിന്‍. ഒരു സിനിമാപരസ്യം പോലും ഭയക്കുന്ന തരത്തിലേക്ക് എത്തിയെങ്കില്‍ നിങ്ങള്‍ക്ക് എന്തോ ബാധിച്ചിരിക്കുന്നുവെന്നാണ് ബെന്യാമിന്‍ പറയുന്നത്. സിനിമ തിയേറ്ററില്‍ തന്നെ പോയി കാണുമെന്നും അദ്ദേഹം കൂട്ടിച്ചേര്‍ത്തു. ഫേസ്ബുക്ക് പോസ്റ്റിലൂടെയായിരുന്നു ബെന്യാമിന്റെ പ്രതികരണം.

കുഞ്ചാക്കോ ബോബനെ നായകനാക്കി രതീഷ് ബാലകൃഷ്ണന്‍ പൊതുവാളാണ് ‘ന്നാ താന്‍ കേസ് കൊട്’ സംവിധാനം ചെയ്തിരിക്കുന്നത്. സന്തോഷ് ടി കുരുവിളയാണ് ചിത്രത്തിന്റെ നിര്‍മ്മാണം. ‘കൊഴുമ്മല്‍ രാജീവന്‍’ എന്നാണ് ചിത്രത്തില്‍ കുഞ്ചാക്കോ ബോബന്‍ അവതരിപ്പിക്കുന്ന കഥാപാത്രത്തിന്റെ പേര്. ‘വിക്രം’, ‘സൂപ്പര്‍ ഡീലക്‌സ്’ ഉള്‍പ്പെടെയുള്ള ചിത്രങ്ങളിലൂടെ ശ്രദ്ധനേടിയ തമിഴ് താരം ഗായത്രി ശങ്കര്‍ ആണ് സിനിമയില്‍ നായികയായെത്തുന്നത്.