മുംബൈ: ഗായിക ഗായിക ലത മങ്കേഷ്കറുടെ ആരോഗ്യ നില ഗുരുതരമായി തുടരുന്നതായി റിപ്പോർട്ട് . ന്യൂമോണിയയും കടുത്ത ശ്വാസതടസ്സവും മൂലം തിങ്കളാഴ്ചയാണ് ലതാ മങ്കേഷ്‌കറെ ആശുപത്രിയിൽ പ്രവേശിപ്പിച്ചത്. ഇപ്പോൾ തീവ്ര പരിചരണ വിഭാഗത്തിലാണ് ലത. ഒരു ഭാഗത്തെ ഹൃദയകോശങ്ങളുടെ പ്രവര്‍ത്തനം നിലച്ച അവസ്ഥയിലാണെന്നും ന്യുമോണിയ ബാധിച്ചിട്ടുണ്ടെന്നുമാണ് ആശുപത്രി വൃത്തങ്ങൾ നൽകുന്ന സൂചന.
ലത ഗുരുതരാവസ്ഥയില്‍ തുടരുകയാണ്, എന്നാല്‍ കഴിഞ്ഞ കുറച്ച്‌ മണിക്കൂറുകളായി അവരുടെ അവസ്ഥയില്‍ ചില പുരോഗതി ഉണ്ടായിട്ടുണ്ടെന്നാണ് ഇന്റേണല്‍ മെഡിസിന്‍ ഫിസിഷ്യന്‍ ഡോ. പ്രതിത് സമദാനി അറിയിച്ചത്. അതേസമയം ആരോഗ്യനില തൃപ്തികരമാണെന്നാണ് ലത മങ്കേഷ്കറുടെ പബ്ലിക് റിലേഷൻസ് ടീം അറിയിച്ചത്. തൊണ്ണൂറുകാരിയായ ലതയെ തിങ്കളാഴ്ച രാവിലെയാണ് ബ്രീച്ച് കാൻഡി ആശുപത്രിയിൽ പ്രവേശിപ്പിച്ചത്. കഠിനപാതകളെ അതിജീവിച്ച്‌ വിജയം നേടിയ ലതാ മങ്കേഷ്‌കര്‍ ഈ ഘട്ടവും തരണം ചെയ്യുമെന്ന് ലതാ മങ്കേഷ്കറുടെ കുടുംബാംഗങ്ങള്‍ ട്വിറ്ററിലൂടെ വ്യക്തമാക്കി.
