ദില്ലി: രാജ്യത്ത് 11,466 പേർക്ക് കൂടി കോവിഡ് (Covid Updates In India) സ്ഥിരീകരിച്ചു. . ഇതോടെ രാജ്യത്ത് ആകെ സജീവ രോഗികളുടെ എണ്ണം 1,39,683 ആയി കുറഞ്ഞിട്ടുണ്ട്. കഴിഞ്ഞ 264 ദിവസത്തെ ഏറ്റവും കുറഞ്ഞ നിരക്കാണിത്.11,961 രോഗികൾക്ക് കൂടി അസുഖം ഭേദമായതോടെ രോഗമുക്തി നേടിയവരുടെ ആകെ എണ്ണം 3.37 കോടി കവിഞ്ഞു.
നിലവിൽ 98.25 ശതമാനമാണ് രോഗമുക്തി നിരക്ക്. ഇതുവരെയുള്ള ഏറ്റവും ഉയർന്ന നിരക്കാണിത്. ഇതിനോടകം 61.85 കോടി കോവിഡ് പരിശോധനകളും രാജ്യത്ത് പൂർത്തിയാക്കിയിട്ടുണ്ട്.
കഴിഞ്ഞ ദിവസങ്ങളിലുണ്ടായ 460 മരണങ്ങൾ കോവിഡ് മൂലമാണെന്ന് സ്ഥീരീകരിച്ചിട്ടുണ്ട്. ഇന്നലെ മാത്രം 52.6 ലക്ഷം ഡോസ് വാക്‌സിനുകളും വിതരണം ചെയ്തു. രാജ്യവ്യാപകമായ കോവിഡ് പ്രതിരോധ കുത്തിവയ്പ്പ് ആരംഭിച്ചത് മുതൽ 109.63 കോടിയിലധികം ഡോസുകളാണ് വിതരണം ചെയ്തത്. വാക്‌സിനേഷന് അർഹതപ്പെട്ട 80 ശതമാനത്തോളം പേർക്ക് ആദ്യ ഡോസ് ലഭിച്ചുകഴിഞ്ഞതായി ആരോഗ്യമന്ത്രാലയം അറിയിച്ചു.
അതേസമയം കേരളത്തിൽ കഴിഞ്ഞ ദിവസം 6409 പേര്‍ക്കാണ് കോവിഡ് സ്ഥിരീകരിച്ചത്. തിരുവനന്തപുരം 972, കൊല്ലം 789, എറണാകുളം 767, തൃശൂര്‍ 734, കോഴിക്കോട് 684, കോട്ടയം 521, കണ്ണൂര്‍ 481, പത്തനംതിട്ട 334, പാലക്കാട് 285, ഇടുക്കി 242, ആലപ്പുഴ 225, മലപ്പുറം 155, വയനാട് 118, കാസര്‍ഗോഡ് 102 എന്നിങ്ങനെയാണ് ജില്ലകളില്‍ രോഗബാധ സ്ഥിരീകരിച്ചത്. സംസ്ഥാനത്തെ വിവിധ ജില്ലകളിലായി 2,27,732 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 2,21,995 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 5737 പേര്‍ ആശുപത്രികളിലും നിരീക്ഷണത്തിലാണ്. 412 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്.
നിലവില്‍ 71,020 കോവിഡ് കേസുകളില്‍, 7.2 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്.
