ദില്ലി: രാജ്യത്ത് കോവിഡ് കേസുകളിൽ (Covid Updates In India) കൂടുതൽ ആശ്വാസം. കഴിഞ്ഞ 24 മണിക്കൂറിനിടെ 10,126 പേർക്ക് മാത്രമാണ് കോവിഡ് സ്ഥിരീകരിച്ചത്. 332 മരണങ്ങളും റിപ്പോർട്ട് ചെയ്തു. 0.93 ശതമാനമാണ് രാജ്യത്തെ ടെസ്റ്റ് പോസിറ്റിവിറ്റി നിരക്ക്. കഴിഞ്ഞ 36 ദിവസമായി ടെസ്റ്റ് പോസിറ്റിവിറ്റി നിരക്ക് ഇതേ നിലയിൽ തുടരുകയാണ്.
കഴിഞ്ഞ 226 ദിവസത്തിനിടെയാണ് പ്രതിദിന രോഗികളുടെ എണ്ണം ഇത്രയും താഴുന്നത്.
കഴിഞ്ഞ 24 മണിക്കൂറിനിടെ 11,982 പേർ രോഗമുക്തി നേടിയതോടെ ആകെ രോഗമുക്തരുടെ എണ്ണം 3,37,75,086 ആയി ഉയർന്നു. 98.25 ശതമാനമാണ് രോഗമുക്തി നിരക്ക്. നിലവിൽ 1,40,638 പേരാണ് രാജ്യത്ത് ചികിത്സയിൽ കഴിയുന്നത്. ഇതുവരെ 4,61,389 മരണങ്ങളാണ് റിപ്പോർട്ട് ചെയ്തിരിക്കുന്നത്.
കോവിഡ് വാക്സിനേഷൻ ആരംഭിച്ചതിന് പിന്നാലെ ഇതുവരെ 109.08 കോടി ഡോസുകൾ ആളുകൾക്ക് നൽകി. കഴിഞ്ഞ ദിവസം 59,08,440 പേരാണ് പ്രതിരോധവാക്സിൻ സ്വീകരിച്ചത്. കോവിഡ് വ്യാപനം ആരംഭിച്ച് ഇതുവരെ 61.72കോടി സാമ്പിളുകൾ പരിശോധിച്ചു.
അതേസമയം കേരളത്തിൽ ഇന്നലെ 5,404 പേര്ക്ക് കോവിഡ് സ്ഥിരീകരിച്ചു. തിരുവനന്തപുരം 777, കൊല്ലം 662, കോഴിക്കോട് 648, എറണാകുളം 577, തൃശൂര് 569, കണ്ണൂര് 387, കോട്ടയം 300, പത്തനംതിട്ട 296, ഇടുക്കി 254, മലപ്പുറം 234, വയനാട് 210, ആലപ്പുഴ 198, പാലക്കാട് 193, കാസര്ഗോഡ് 99 എന്നിങ്ങനെയാണ് ജില്ലകളിലെ രോഗബാധ നിരക്ക്. സംസ്ഥാനത്തെ വിവിധ ജില്ലകളിലായി 2,30,903 പേരാണ് ഇപ്പോള് നിരീക്ഷണത്തിലുള്ളത്. ഇവരില് 2,25,018 പേര് വീട്/ഇന്സ്റ്റിറ്റിയൂഷണല് ക്വാറന്റൈനിലും 5885 പേര് ആശുപത്രികളിലും നിരീക്ഷണത്തിലാണ്. 318 പേരെയാണ് പുതുതായി ആശുപത്രിയില് പ്രവേശിപ്പിച്ചത്. നിലവില് 71,316 കോവിഡ് കേസുകളില്, 7.2 ശതമാനം വ്യക്തികള് മാത്രമാണ് ആശുപത്രി/ഫീല്ഡ് ആശുപത്രികളില് പ്രവേശിപ്പിക്കപ്പെട്ടിട്ടുള്ളത്.