ആശങ്കയുണർത്തിക്കൊണ്ട് മുംബൈ ഗൊരേഗാവിലുള്ള ഫിലിം സിറ്റിയിൽ പുള്ളിപ്പുലിയെ കണ്ടു. ഞായറാഴ്ച രാത്രിയാണ് ഫിലിം സിറ്റിയിലെ ഒരു സ്റ്റുഡിയോയിൽ ഷൂട്ടിങ്ങിനായി തയ്യാറാക്കിയിരിക്കുന്ന സെറ്റിനുള്ളിൽ പുള്ളിപ്പുലി കയറിയത്. ഫിലിം സിറ്റിക്കുള്ളിൽ പുള്ളിപ്പുലിയെ കണ്ടെത്തിയതോടെ സിനിമ പ്രവർത്തകരും തൊഴിലാളികളും പരിഭ്രാന്തിയിലായി.
പുലിയുടെ ദൃശ്യങ്ങൾ പ്രചരിച്ചതോടെവിഷയം ശ്രദ്ധയിൽപ്പെട്ട അധികൃതർ ഫിലിം സിറ്റിയിൽ പരിശോധനനടത്തുകയും പാതി ഭക്ഷിച്ച ഒരു നായയുടെ ജഡവും സെറ്റിന് സമീപത്തു നിന്ന് കണ്ടെത്തുകയും ചെയ്തു. പുള്ളിപ്പുലികൾ ധാരാളമുള്ള സഞ്ജയ് ഗാന്ധി ദേശീയോദ്യാനത്തിന്റെ അതിർത്തിയോട് ചേർന്നാണ് വിനോദസഞ്ചാര കേന്ദ്രം കൂടിയായ ഫിലിം സിറ്റി പ്രവർത്തിക്കുന്നത്. വാർത്തയറിഞ്ഞ പ്രദേശവാസികൾ പരിഭ്രാന്തിയിലാണെങ്കിലും നിലവിൽ ഭയപ്പെടാനുള്ള സാഹചര്യമില്ല എന്ന് വനംവകുപ്പ് ഉദ്യോഗസ്ഥർ അറിയിക്കുന്നു. പ്രദേശത്ത് പട്രോളിങ് ശക്തമാക്കിയിട്ടുണ്ട്.ജനങ്ങൾക്കായി പ്രത്യേക മാർഗനിർദേശങ്ങളും വനംവകുപ്പ് പുറത്തിറക്കിയിട്ടുണ്ട്. വനത്തിനോട് ചേർന്ന പ്രദേശങ്ങളിൽക്കൂടി പരമാവധി കൂട്ടമായി തന്നെ നടക്കാൻ ആളുകൾ ശ്രദ്ധിക്കണം. ഇരുട്ടുള്ള ഭാഗത്തേക്ക് പോകാതിരിക്കുക. പോകുന്നെണ്ടിൽ ടോർച്ച് കരുതുകയും മൊബൈൽ റേഡിയോ കഴിയുമെങ്കിൽ ഓൺ ചെയ്തു സൂക്ഷിക്കുകയും ചെയ്യണമെന്നും നിർദേശമുണ്ട്.
