പൃഥ്വിരാജ് സുകുമാരന്‍ സംവിധാനം ചെയ്ത് മോഹന്‍ലാല്‍ നായകനായെത്തിയ ലൂസിഫറിന്റെ രണ്ടാംഭാഗത്തിന്റെ ഔദ്യോഗിക പ്രഖ്യാപനം നടന്നു. ബോക്‌സ്ഓഫീസില്‍ റെക്കാഡുകള്‍ സൃഷ്ടിച്ച ലൂസിഫറിന്റെ രണ്ടാംഭാഗത്തിന് എമ്പുരാന്‍ എന്നാണ് പേരിട്ടിരിക്കുന്നത്.
കൊച്ചിയില്‍ മോഹന്‍ലാലിന്റെ വസതിയില്‍ വച്ചാണ് ചിത്രത്തിന്റെ രണ്ടാം ഭാഗത്തിന്റെ പ്രഖ്യാപനം നടന്നത്. മോഹന്‍ലാലിനെ കൂടാതെ സംവിധായകന്‍ പൃഥ്വിരാജ്, തിരക്കഥാകൃത്ത് മുരളി ഗോപി, നിര്‍മാതാവ് ആന്റണി പെരുമ്പാവൂര്‍ തുടങ്ങിയവര്‍ പങ്കെടുത്തു.
ലൂസിഫറില്‍ കണ്ടതിന്റെ തുടര്‍ക്കഥ മാത്രമാകില്ല രണ്ടാം ഭാഗത്തില്‍ കാണുകയെന്നു സംവിധായകന്‍ പൃഥ്വിരാജ് അറിയിച്ചു. ആദ്യ ഭാഗത്തില്‍ ഒരു മഞ്ഞ് കട്ടയുടെ മുകള്‍ഭാഗം മാത്രമേ ഉണ്ടായിരുന്നുള്ളൂ എന്നും അതിലേറെ കാണാന്‍ കിടക്കുന്നുണ്ടെന്നും തിരക്കഥാകൃത്ത് മുരളി ഗോപി വ്യക്തമാക്കി.
മുരളി ഗോപിയുടെ തിരക്കഥയില്‍ ആശീര്‍വാദ് സിനിമാസ് നിര്‍മ്മിച്ച ലൂസിഫറിന് രണ്ടാം ഭാഗമുണ്ടായേക്കുമെന്ന് ചിത്രം റിലീസ് ചെയ്ത അന്നു മുതല്‍ പ്രചരിക്കുന്നുണ്ട്.
മുരളി ഗോപിയും പൃഥിരാജും രണ്ടാംഭാഗത്തെക്കുറിച്ച് ഫേസ്ബുക്ക് പോസ്റ്റുകളില്‍ ചില സൂചനകളും നല്‍കിയിരുന്നു.. ഇതോടെയാണ് രണ്ടാംഭാഗം ഉണ്ടാകുമെന്ന തര്‍ച്ചകള്‍ക്ക് ചൂടുപിടിച്ചത്.
ആരാധകരുടെ ആകാംക്ഷ വര്‍ദ്ധിപ്പിച്ച് ലൂസിഫര്‍ ടീം വീണ്ടും മറ്റൊരു പോസ്റ്റുമായി രംഗത്തെത്തിയത്. ലൂസിഫറിലെ എല്‍ ഹാഷ്ടാഗിനൊപ്പം ഫിനാലെയുടെ വരവുണ്ടെന്നും അതിന്റെ പ്രഖ്യാപനം ചൊവ്വാഴ്ചയുണ്ടാകുമെന്നും ഇവര്‍ അറിയിച്ചിരുന്നു
