ന്യൂഡൽഹി: രാജ്യത്ത് പൈപ്പിലൂടെയുള്ള പാചകവാതക വിതരണം വേഗത്തിലാക്കാൻ ലക്ഷ്യമിട്ട് കേന്ദ്ര സർക്കാർ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. ഗ്യാസ് പൈപ്പ്‌ലൈൻ സൗകര്യം ലഭ്യമായ പ്രദേശങ്ങളിൽ താമസിക്കുന്നവർ നിർബന്ധമായും പിഎൻജി കണക്ഷനിലേക്ക് മാറണമെന്നാണ് പുതിയ ഉത്തരവ്. ഈ നിർദ്ദേശം പാലിക്കാത്തവരുടെ നിലവിലുള്ള എൽപിജി സിലിണ്ടർ കണക്ഷനുകൾ റദ്ദാക്കുമെന്നും സർക്കാർ മുന്നറിയിപ്പ് നൽകിയിട്ടുണ്ട്. പൈപ്പ്‌ലൈൻ സ്ഥാപിക്കുന്ന പ്രവർത്തനങ്ങൾ തടയാൻ ഇനി മുതൽ ഹൗസിംഗ് സൊസൈറ്റികൾക്കോ റെസിഡൻസ് വെൽഫെയർ അസോസിയേഷനുകൾക്കോ അധികാരമുണ്ടാവില്ലെന്നും ഇതിൽ സർക്കാർ കർശനമായി ഇടപെടുമെന്നും അധികൃതർ വ്യക്തമാക്കി.
നിലവിലെ ആഗോള യുദ്ധസാഹചര്യങ്ങൾ കണക്കിലെടുത്ത് ഇറക്കുമതിയെ ആശ്രയിക്കുന്നത് കുറയ്ക്കുക എന്ന ലക്ഷ്യത്തോടെയാണ് പിഎൻജി വിതരണം യുദ്ധകാലാടിസ്ഥാനത്തിൽ പൂർത്തിയാക്കാൻ സർക്കാർ നീക്കം നടത്തുന്നത്. രാജ്യത്തെ എൽപിജി ആവശ്യകതയുടെ 90 ശതമാനവും ഇറക്കുമതിയിലൂടെയാണ് നിലവിൽ നിറവേറ്റുന്നത്. യുദ്ധം നീണ്ടുപോയാൽ ഇറക്കുമതി തടസ്സപ്പെടാൻ സാധ്യതയുള്ളതിനാലാണ് പ്രകൃതിവാതകത്തിലേക്ക് മാറാൻ ജനങ്ങളോട് ആവശ്യപ്പെടുന്നത്. പുതിയ സാഹചര്യത്തിൽ ഇതിനോടകം 2.25 ലക്ഷം പേരാണ് പുതുതായി പിഎൻജി കണക്ഷൻ എടുത്തത്. അതേസമയം എൽപിജി ഉൽപ്പാദനം രാജ്യത്ത് പൂർണ്ണതോതിൽ നടക്കുന്നുണ്ടെന്നും വ്യാജപ്രചാരണങ്ങളിൽ വിശ്വസിക്കരുതെന്നും സർക്കാർ അറിയിച്ചു.
രാജ്യത്ത് ഇനി 10 ദിവസത്തേക്കുള്ള ക്രൂഡ് ഓയിൽ മാത്രമേ ബാക്കിയുള്ളൂ എന്ന വിവരാകാശ രേഖകൾ പുറത്തുവന്നതോടെ ജനങ്ങൾക്കിടയിൽ വലിയ ആശങ്ക പടർന്നിരുന്നു. എന്നാൽ ആവശ്യത്തിന് ഇന്ധനം സംഭരിച്ചിട്ടുണ്ടെന്നും പെട്രോൾ പമ്പുകളിൽ അനാവശ്യ തിരക്ക് കൂട്ടി പരിഭ്രാന്തി സൃഷ്ടിക്കേണ്ടതില്ലെന്നും പെട്രോളിയം സെക്രട്ടറി സുജാത ശർമ്മ വ്യക്തമാക്കി. നിലവിലെ പ്രതിസന്ധി പരിഹരിക്കുന്നതിനായി റഷ്യയിൽ നിന്ന് 6 കോടി ബാരൽ ക്രൂഡ് ഓയിൽ വാങ്ങാൻ ഇന്ത്യ തീരുമാനിച്ചതായും അവർ അറിയിച്ചു. വിതരണ ശൃംഖല സുരക്ഷിതമാണെന്നും ഇന്ധനക്ഷാമം ഉണ്ടാകില്ലെന്നും സർക്കാർ ജനങ്ങൾക്ക് ഉറപ്പുനൽകുന്നു.
