മാധവ്ജി ശതാബ്‌ദി ആഘോഷങ്ങൾക്ക് 14 ന് തുടക്കമാകും; കേരളാ ഗവർണർ രാജേന്ദ്ര ആർലേക്കർ ഉദ്‌ഘാടനം ചെയ്യും; മാധവീയം പുരസ്‌കാരം കുമ്മനം രാജശേഖരന്

കൊച്ചി: “ജന്മം കൊണ്ടല്ല കർമം കൊണ്ടാണ് ബ്രാഹ്മണ്യം കൈവരുന്നത്” എന്ന് പ്രഖ്യാപിച്ചുകൊണ്ട് കേരളത്തിൽ ഒരു സാമൂഹ്യവിപ്ലവത്തിനു തിരികൊളുത്തിയ സംഘപ്രചാരകൻ മാധവ്ജിയുടെ ജന്മശതാബ്‌ദി ആഘോഷങ്ങൾക്ക് 14 ന് തുടക്കമാകും. തന്ത്രവിദ്യാ പീഠത്തിന്റെ ആഭിമുഖ്യത്തിലാണ് പരിപാടി. ജന്മശതാബ്‌ദി ആഘോഷവും അനുസ്മരണവും ആലുവ വെളിയത്തുനാട് തന്ത്രവിദ്യാപീഠത്തിൽ വച്ച് നടക്കും. രാവിലെ പത്തിന് നടക്കുന്ന സമ്മേളനത്തിന്റെ ഉദ്‌ഘാടനം കേരളാ ഗവർണർ രാജേന്ദ്ര ആർലേക്കർ നിർവ്വഹിക്കും.

തന്ത്രവിദ്യാപീഠം മുഖ്യരക്ഷാധികാരി പി ഇ ബി മേനോൻ നിലവിളക്ക് തെളിയിക്കും. ചടങ്ങിൽ ഇക്കൊല്ലത്തെ മാധവീയം പുരസ്‌കാരം മുൻ മിസോറാം ഗവർണർ കുമ്മനം രാജശേഖരന് കേരളാ ഗവർണർ രാജേന്ദ്ര ആർലേക്കർ സമ്മാനിക്കും. മാധവ്ജിയുടെ സ്മരണാർത്ഥം തന്ത്രവിദ്യാ പീഠം ഏർപ്പെടുത്തിയിട്ടുള്ളതാണ് മാധവീയം പുരസ്‌കാരം. തന്ത്രവിദ്യാപീഠം പ്രസിഡന്റ് ആമേട വാസുദേവൻ നമ്പൂതിരി അദ്ധ്യക്ഷനാകുന്ന ചടങ്ങിൽ രാഷ്ട്രീയ സ്വയംസേവക സംഘം ഉത്തരകേരളം പ്രാന്ത കാര്യവാഹക് പി എൻ ഈശ്വരൻ അനുസ്മരണ പ്രഭാഷണം നടത്തും.

രാഷ്ട്രീയ സ്വയംസേവക സംഘത്തിന്റെ കേരളത്തിലെ ആദ്യകാല പ്രചാരകനായ മാധവ്ജി ക്ഷേത്ര സംരക്ഷണ സമിതിയുടെയും തന്ത്രവിദ്യാപീഠത്തിന്റെയും സ്ഥാപകനാണ്. 1982ൽ നടന്ന ചരിത്രപ്രസിദ്ധമായ വിശാലഹിന്ദു സമ്മേളനത്തിന്റെ മുഖ്യ സംഘാടകനായി മാധവ് ജി സേവനമനുഷ്ഠിച്ചിട്ടുണ്ട്. 1984ൽ സമിതിയുടെ കോട്ടയം ജില്ലാ ഘടകം മാധവ് ജിയുടെ ക്ഷേത്ര സംബന്ധമായ 9 ലേഖനങ്ങൾ സമാഹരിച്ചു കൊണ്ട് ക്ഷേത്ര ചൈതന്യ രഹസ്യം എന്ന ഗ്രന്ഥം പ്രസിദ്ധീകരിക്കുകയുണ്ടായി. സാധാരണക്കാർക്കുപോലും മനസ്സിലാവുന്ന ലളിതമായ ഭാഷയായിരുന്നു അദ്ദേഹത്തിന്റേത്.