കോന്നി: പത്തനംതിട്ടയിൽ പതിമൂന്നുകാരിയെ സഹപാഠികളായ വിദ്യാർഥികൾ ഉൾപ്പെടെയുള്ളവർ പീഡിപ്പിച്ചെന്ന പരാതി വ്യാജമെന്ന് പോലീസ് കണ്ടെത്തൽ. പെൺകുട്ടി ലൈംഗിക പീഡനത്തിന് ഇരയായിട്ടില്ലെന്ന് വൈദ്യപരിശോധനയിൽ വ്യക്തമായി. പ്രണയനൈരാശ്യത്തെത്തുടർന്നുണ്ടായ വൈരാഗ്യമാണ് സഹപാഠികൾക്കെതിരെ ഇത്തരമൊരു വ്യാജപരാതി ഉന്നയിക്കാൻ കുട്ടിയെ പ്രേരിപ്പിച്ചതെന്ന് പോലീസ് വൃത്തങ്ങൾ സ്ഥിരീകരിച്ചു. സംഭവവുമായി ബന്ധപ്പെട്ട് കസ്റ്റഡിയിലെടുത്തിരുന്ന ആറുപേരെയും പോലീസ് വിട്ടയച്ചു.
ഒമ്പതാം ക്ലാസ് വിദ്യാർഥിനിയായ പെൺകുട്ടി പത്തുപേർക്കെതിരെയായിരുന്നു പീഡനപരാതി ഉന്നയിച്ചിരുന്നത്. സഹപാഠിയായ ഒരു ആൺകുട്ടിയുമായി പ്രണയത്തിലായിരുന്ന പെൺകുട്ടി രണ്ടാഴ്ച മുമ്പാണ് ബ്രേക്ക്അപ്പ് ആയത്. ഈ പ്രണയനൈരാശ്യവും അതിനെത്തുടർന്നുണ്ടായ കടുത്ത വൈരാഗ്യവുമാണ് സഹപാഠികളെ കുടുക്കാൻ ഇത്തരമൊരു ഞെട്ടിക്കുന്ന ആരോപണത്തിലേക്ക് നയിച്ചതെന്നാണ് പോലീസിന്റെ പ്രാഥമിക വിലയിരുത്തൽ. സ്കൂളിൽ വെച്ച് നടത്തിയ കൗൺസിലിങ്ങിനിടെയാണ് പെൺകുട്ടി ക്രൂരമായ ലൈംഗികാതിക്രമത്തിന് ഇരയായെന്ന വിവരം വെളിപ്പെടുത്തിയത്. തുടർന്ന് പെൺകുട്ടിയുടെ മൊഴിയുടെ അടിസ്ഥാനത്തിൽ പോലീസ് രണ്ട് പോക്സോ കേസുകൾ രജിസ്റ്റർ ചെയ്യുകയായിരുന്നു. പ്രതികളിൽ ഒരാളായ പെൺകുട്ടിയുടെ വീട്ടിൽ വെച്ചും സ്കൂളിൽ വെച്ചും ലൈംഗികാതിക്രമം നടന്നുവെന്നായിരുന്നു മൊഴി.
പരാതിയുടെ ഗൗരവം കണക്കിലെടുത്ത് പ്രായപൂർത്തിയാകാത്ത നാല് പേരുൾപ്പെടെ ആറുപേരെ പോലീസ് ഉടനടി കസ്റ്റഡിയിലെടുത്തിരുന്നു. എന്നാൽ ചോദ്യം ചെയ്യലിൽ പെൺകുട്ടിയുടെ മൊഴികളിൽ കടുത്ത വൈരുധ്യങ്ങൾ പ്രകടമാകുകയും അറസ്റ്റിലേക്ക് നീങ്ങാൻ ആവശ്യമായ യാതൊരുവിധ തെളിവുകളും ലഭിക്കാതിരിക്കുകയും ചെയ്തു. സാഹചര്യങ്ങളും മൊഴികളും പൊരുത്തപ്പെടാതെ വന്നതോടെയാണ് കസ്റ്റഡിയിലുണ്ടായിരുന്നവരെ വിട്ടയക്കാൻ പോലീസ് തീരുമാനിച്ചത്. പീഡനം നടന്നിട്ടില്ലെന്ന് വൈദ്യപരിശോധനാ ഫലം കൂടി വന്നതോടെ പരാതി പൂർണ്ണമായും വ്യാജമാണെന്ന് ഉറപ്പിച്ചു. കുട്ടിയെ ഇത്രയും ഗുരുതരമായ ഒരു വ്യാജപരാതിയിലേക്ക് നയിച്ച സാഹചര്യങ്ങളെക്കുറിച്ചും ഇതിന് പിന്നിൽ മറ്റാരുടെയെങ്കിലും പ്രേരണയുണ്ടോ എന്നതിനെക്കുറിച്ചും പോലീസ് കൂടുതൽ അന്വേഷണം നടത്തിവരികയാണ്.
