വാഷിംഗ്ടൺ: പ്രമുഖ പത്രമായ വാഷിംഗ്ടൺ പോസ്റ്റിന്റെ ചീഫ് എക്സിക്യൂട്ടീവ് ഓഫീസറും പബ്ലിഷറുമായ വിൽ ലൂയിസ് സ്ഥാനം ഒഴിഞ്ഞു. സ്ഥാപനത്തിൽ കൂട്ടപ്പിരിച്ചു വിടൽ നടത്തി ദിവസങ്ങൾക്കുള്ളിലാണ് ലൂയിസിന്റെ അപ്രതീക്ഷിത രാജി. പത്രത്തിന്റെ നിലനിൽപ്പിനായി കഠിനമായ തീരുമാനങ്ങൾ എടുക്കേണ്ടി വന്നുവെന്ന് ജീവനക്കാർക്ക് അയച്ച സന്ദേശത്തിൽ അദ്ദേഹം വ്യക്തമാക്കി. വാഷിംഗ്ടൺ പോസ്റ്റിന്റെ സുസ്ഥിരമായ ഭാവി ഉറപ്പാക്കാനാണ് താൻ ശ്രമിച്ചതെന്നും നിഷ്പക്ഷമായ വാർത്തകൾ ദശലക്ഷക്കണക്കിന് വായനക്കാരിലേക്ക് എത്തിക്കാൻ ഈ മാറ്റങ്ങൾ അനിവാര്യമായിരുന്നുവെന്നും അദ്ദേഹം അവകാശപ്പെട്ടു.
വിൽ ലൂയിസിന് പകരമായി ചീഫ് ഫിനാൻഷ്യൽ ഓഫീസർ ജെഫ് ഡി ഓനോഫ്രിയോയെ താൽക്കാലിക സിഇഒ ആയും പബ്ലിഷറായും നിയമിച്ചു. ഗൂഗിൾ, യാഹൂ തുടങ്ങിയ പ്രമുഖ കമ്പനികളിൽ പ്രവർത്തിച്ച പരിചയവുമായാണ് ജെഫ് ഡി ഓനോഫ്രിയോ ഈ പദവിയിലേക്ക് എത്തുന്നത്. വായനക്കാരുടെ താൽപ്പര്യങ്ങൾക്കും വിവരങ്ങൾക്കും മുൻഗണന നൽകിക്കൊണ്ടുള്ള പ്രവർത്തനശൈലിയായിരിക്കും തന്റേതെന്ന് അദ്ദേഹം വ്യക്തമാക്കിയിട്ടുണ്ട്. അതേസമയം, ലൂയിസിന്റെ രാജി പത്രത്തിന്റെ ചരിത്രത്തിലെ അനിവാര്യമായ ഒന്നായിരുന്നുവെന്ന് വാഷിംഗ്ടൺ പോസ്റ്റ് ഗിൽഡ് പ്രതികരിച്ചു. ഒരു മഹത്തായ മാധ്യമ സ്ഥാപനത്തെ തകർക്കാനാണ് അദ്ദേഹം ശ്രമിച്ചതെന്നും വെട്ടിക്കുറച്ച തൊഴിലുകൾ പുനഃസ്ഥാപിക്കണമെന്നും യൂണിയനുകൾ ആവശ്യപ്പെട്ടു.
സ്ഥാപനത്തിന്റെ ഉടമയും ശതകോടീശ്വരനുമായ ജെഫ് ബെസോസ് ഈ നേതൃമാറ്റത്തെ ഒരു പുതിയ അവസരമായാണ് വിശേഷിപ്പിച്ചത്. വാഷിംഗ്ടൺ പോസ്റ്റിന് ഉന്നതമായ പത്രപ്രവർത്തന ലക്ഷ്യങ്ങളുണ്ടെന്നും വായനക്കാരുടെ പ്രതികരണങ്ങൾ വിജയത്തിലേക്കുള്ള വഴികാട്ടിയാണെന്നും അദ്ദേഹം പറഞ്ഞു. എന്നാൽ കഴിഞ്ഞ കുറച്ചു ദിവസങ്ങളായി സ്ഥാപനത്തിൽ അരങ്ങേറുന്ന സംഭവവികാസങ്ങൾ അങ്ങേയറ്റം നാടകീയമാണ്. ജീവനക്കാരുടെ എണ്ണത്തിൽ മൂന്നിലൊന്ന് കുറവ് വരുത്തിയ നടപടി പത്രത്തിന്റെ ചരിത്രത്തിലെ ഏറ്റവും ഇരുണ്ട ദിനങ്ങളിലൊന്നാണെന്ന് മുൻ എക്സിക്യൂട്ടീവ് എഡിറ്റർ മാർട്ടി ബാരൺ വിമർശിച്ചിരുന്നു.
അമേരിക്കൻ പ്രസിഡന്റ് സ്ഥാനാർത്ഥികൾക്ക് ഔദ്യോഗിക പിന്തുണ നൽകുന്നത് പത്രം അവസാനിപ്പിച്ചതിനെത്തുടർന്ന് ലക്ഷക്കണക്കിന് വരിക്കാരെ നഷ്ടപ്പെട്ടത് വിൽ ലൂയിസിന് വലിയ തിരിച്ചടിയായിരുന്നു. കൂടാതെ, എഡിറ്റോറിയൽ വിഭാഗത്തിലെ അഭിപ്രായ ഭിന്നതകളും ലണ്ടനിലെ ഫോൺ ഹാക്കിംഗ് വിവാദവുമായി ബന്ധപ്പെട്ട ആരോപണങ്ങളും അദ്ദേഹത്തിന്റെ കാലാവധി വിവാദത്തിലാക്കി. എക്സിക്യൂട്ടീവ് എഡിറ്ററായിരുന്ന സാലി ബുസ്ബിയുടെ പടിയിറക്കവും വിൽ ലൂയിസിന്റെ പരാജയപ്പെട്ട പുതിയ പദ്ധതികളും സ്ഥാപനത്തിനുള്ളിൽ വലിയ പ്രതിഷേധങ്ങൾക്ക് കാരണമായിരുന്നു. പുതിയ നേതൃത്വത്തിന് കീഴിൽ വാഷിംഗ്ടൺ പോസ്റ്റ് സാമ്പത്തിക പ്രതിസന്ധികളെ എങ്ങനെ മറികടക്കുമെന്നാണ് മാദ്ധ്യമലോകം ഉറ്റുനോക്കുന്നത്.
