കൊച്ചി : മഞ്ചേശ്വരം കള്ളവോട്ട് കേസില്‍ നിന്ന് പിന്മാറാന് തീരുമാനിച്ച കെ സുരേന്ദ്രനില്‍ നിന്നും മുസ്ലീം ലീഗ് കോടതി ചെലവ് ആവശ്യപ്പെട്ടതോടെ താന്‍ ഹര്‍ജി പിന്‍വലിക്കാന്‍ തയ്യാറല്ലെന്ന് ബിജെപി സംസ്ഥാന ജനറല്‍ സെക്രറി കെ സുരേന്ദ്രന്‍ കോടതിയെ അറിയിച്ചു. ഇതുസംബന്ധിച്ച് വാദം കേള്‍ക്കാന്‍ കോടതി കേസ് ഈ മാസം 18 ലേക്ക് മാറ്റിവച്ചു.
സുരേന്ദ്രനില്‍ നിന്ന് കോടതിച്ചെലവ് ഈടാക്കിക്കിട്ടണമെന്ന് അബ്ദുള്‍ റസാഖിന്റെ അഭിഭാഷകനാണ് കോടതിയെ അറിയിച്ചത്. മഞ്ചേശ്വരം നിയമസഭാ തിരഞ്ഞെടുപ്പ് കേസിലെ നടപടികള്‍ ഹൈക്കോടതി ഇന്ന് അവസാനിപ്പിക്കാനിരിക്കവേയാണ് ആവശ്യവുമായി അബ്ദുള്‍ റസാഖിന്റെ അഭിഭാഷകന്‍ കോടതിയിലെത്തിയത്.
2016 ലെ തിരഞ്ഞെടുപ്പില്‍ മഞ്ചേശ്വരം മണ്ഡലത്തില്‍ കള്ളവോട്ടു നടന്നിട്ടുണ്ടെന്ന് വ്യക്തമാക്കിയാണ് കെ സുരേന്ദ്രന്‍ ഹൈക്കോടതില്‍ ഹര്‍ജി നല്‍കിയത്. കേസിലെ മുഴുവന്‍ സാക്ഷികള്‍ക്കും സമന്‍സു പോലുമെത്തിക്കാന്‍ കഴിയാത്ത സാഹചര്യത്തില്‍ സാക്ഷി വിസ്താരം പ്രായോഗികമല്ലെന്ന് ചൂണ്ടിക്കാട്ടിയാണ് കേസില്‍ നിന്നും പിന്മാറാന് കെ സുരേന്ദ്രന്‍ തീരുമാനിച്ചത്.
