തിരുവനന്തപുരം: കേരളത്തിലെ കോടതികളുടെ പ്രവർത്തനത്തിൽ അടിമുടി മാറ്റങ്ങൾ വരുത്താനൊരുങ്ങുന്നു. കോടതികൾ ഇനി പൂർണമായും ജനസൗഹൃദമാക്കാനാണ് നീക്കം. കോടതികളിലെത്തുന്ന കക്ഷികൾക്ക് എല്ലാ സൗകര്യങ്ങളും ഒരുക്കണമെന്ന സുപ്രീംകോടതിയുടെ നിർദേശം നടപ്പാക്കുകയാണ് കേരളം. ഇതിനായി 11.34 കോടി രൂപയുടെ ഭരണാനുമതിയായി. ഈ സാമ്പത്തികവർഷംതന്നെ സൗകര്യങ്ങൾ കൊണ്ടുവരാനാണ് തീരുമാനം.
മാറ്റങ്ങള്‍ക്ക് മുന്നോടിയായി ജില്ലാ ജഡ്ജിമാരോട് അതത് ജില്ലകളിലെ കോടതികളുടെ ആവശ്യങ്ങൾ അറിയിക്കാൻ ഹൈക്കോടതി ആവശ്യപ്പെട്ടു. മാറ്റങ്ങള്‍ നടപ്പാക്കുന്നതിന് ആവശ്യമായ ഉപകരണങ്ങള്‍ സർക്കാർ-പൊതുമേഖലാ സ്ഥാപനങ്ങളിൽനിന്നുമാത്രമേ വാങ്ങാവൂവെന്നും ഹൈക്കോടതി നിർദേശിച്ചു.
അമ്മമാര്‍ക്ക് മുലയുട്ടാനുളള സൗകര്യം, കക്ഷികൾക്കുള്ള വിശ്രമ മുറി, കോടതി നടപടികൾ മൈക്കിലൂടെ കേൾക്കാനുള്ള സൌകര്യം, ഇലക്ട്രോണിക്‌സ് ഡിസ്‌പ്ലേ ബോര്‍ഡ്, ഭിന്നശേഷിക്കാർക്കുള്ള റാമ്പുകൾ എന്നിങ്ങനെ കോടതിയിലെത്തുന്നവര്‍ക്ക് യാതൊരു ബുദ്ധിമുട്ടും അനുഭവപ്പെടാത്ത വിധമുള്ള സേവനങ്ങളാണ് ഒരുങ്ങുന്നത്.
ജില്ലാ കോടതികൾ, സിവിൽ സെഷൻസ് കോടതികൾ, മോട്ടോർ വാഹനാപകട കോടതികൾ, സി ബി ഐ കോടതികൾ, കുടുംബകോടതികൾ, ക്രിമിനൽ കോടതികൾ, മജിസ്ട്രേട്ട് കോടതികൾ, ഗ്രാമന്യായാലയങ്ങൾ എന്നിവിടങ്ങളില്‍ ഈ മാറ്റങ്ങള്‍ നടപ്പാക്കും.
