മോസ്കോ : ടെന്നീസിലെ ഗ്ലാമർ താരം റഷ്യയുടെ മരിയ ഷറപ്പോവ വിവാഹിതയാകുന്നു. ബ്രിട്ടിഷ് വ്യവസായി അലക്സാണ്ടർ ജിൽക്സാണ് വരൻ. മുപ്പത്തിമൂന്നുകാരിയായ ഷറപ്പോവ ഈ വർഷം ഫെബ്രുവരിയിൽ പ്രൊഫഷണൽ ടെന്നീസിൽനിന്ന് വിരമിച്ചിരുന്നു. 41കാരനായ അലക്സാണ്ടർ ജിൽക്സുമായി വിവാഹ നിശ്ചയം കഴിഞ്ഞ വിവരം ഷറപ്പോവ തന്റെ ഇൻസ്റ്റഗ്രാം പോസ്റ്റിലൂടെ വെളിപ്പെടുത്തുകയായിരുന്നു. ആദ്യ കാഴ്ചയിൽത്തന്നെ ഞാൻ യെസ് പറഞ്ഞു. ഇത് നമ്മുടെ കൊച്ചു രഹസ്യമായിരുന്നു. അല്ലേ? – അലക്സാണ്ടർ ജിൽക്സിനൊപ്പമുള്ള ചിത്രങ്ങൾ പങ്കുവച്ച് ഷറപ്പോവ കുറിച്ചു.
സെർബിയയിൽ ജനിച്ച ഷറപ്പോവ ലോക ഒന്നാം നമ്പർ താരമായിരുന്നു. 2004ൽ 17ാം വയസിൽ വിമ്പിൾഡൻ ജേതാവായി. 2005ൽ ലോക ഒന്നാം നമ്പർ താരമായി. 2006ൽ യുഎസ് ഓപ്പൺ വനിതാ സിംഗിൾസ് കിരീടം, 2008ൽ ഓസ്ട്രേലിയൻ ഓപ്പൺ കിരീടം, 2012ൽ ഫ്രഞ്ച് ഓപ്പൺ കിരീടം, ലണ്ടൻ ഒളിംപിക്സിൽ വെള്ളി തുടങ്ങിയവ സ്വന്തമാക്കി. 2016ൽ നിരോധിത മരുന്ന് ഉപയോഗിച്ചതിന്റെ പേരിൽ വിലക്കു നേരിട്ടെങ്കിലും 2017ൽ മത്സരരംഗത്തേക്കു തിരിച്ചെത്തി. പക്ഷേ, പഴയ ഫോമിലേക്ക് ഉയരാൻ സാധിച്ചില്ല. ഷറപ്പോവ 373ാം റാങ്കിലിരിക്കെയാണ് വിരമിച്ചത്.