കൊച്ചി : സംസ്ഥാനത്തെ ഐടി മേഖലയെ ആശങ്കയിലാഴ്ത്തി വീണ്ടും കൂട്ടപ്പിരിച്ചുവിടല്‍ പരാതി. ആഗോള ഹെല്‍ത്ത് കെയര്‍ കമ്പനിയായ കൊറോ ഹെല്‍ത്തിലെ പിരിച്ചുവിടലുമായി ബന്ധപ്പെട്ട് സര്‍ക്കാര്‍ തലത്തില്‍ ചര്‍ച്ചകള്‍ പുരോഗമിക്കുന്നതിനിടെയാണ് കൊച്ചി ആസ്ഥാനമായി പ്രവര്‍ത്തിക്കുന്ന മറ്റൊരു പ്രമുഖ ഐടി കമ്പനിയായ ടാല്‍റോപ്പിലും മുന്നൂറോളം ജീവനക്കാരെ കൂട്ടത്തോടെ പുറത്താക്കിയതായി റിപ്പോര്‍ട്ടുകള്‍ വരുന്നത്. മാസങ്ങളോളം ജോലി ചെയ്തതിന്റെ ശമ്പള കുടിശ്ശിക പോലും നല്‍കാതെയാണ് തങ്ങളെ പെട്ടെന്ന് പിരിച്ചുവിട്ടതെന്ന് ജീവനക്കാര്‍ മാധ്യമങ്ങളോട് വെളിപ്പെടുത്തി.
പല ജീവനക്കാര്‍ക്കും ആറു മാസം മുതല്‍ പതിനൊന്ന് മാസം വരെയുള്ള ശമ്പളം കമ്പനിയില്‍ നിന്ന് ലഭിക്കാനുണ്ട്. ഫണ്ടിങ് പ്രതിസന്ധിയാണ് ശമ്പളം മുടങ്ങാന്‍ കാരണമായി മാനേജ്‌മെന്റ് ചൂണ്ടിക്കാണിക്കുന്നത്. നിക്ഷേപകര്‍ പിന്മാറിയതോടെ സാമ്പത്തിക പ്രതിസന്ധി രൂക്ഷമായെന്നും പുതിയതായി ആരംഭിക്കുന്ന റിയല്‍ എസ്റ്റേറ്റ് സംരംഭത്തില്‍ നിന്ന് ഫണ്ട് ലഭിക്കുന്ന മുറയ്ക്ക് കുടിശ്ശിക തീര്‍ക്കാമെന്നുമാണ് കമ്പനിയുടെ ഇപ്പോഴത്തെ വിശദീകരണം.
വരുന്ന ഒക്ടോബര്‍ മുപ്പത്തിയൊന്നിനകം കുടിശ്ശിക മുഴുവന്‍ കൊടുത്തുതീര്‍ക്കുമെന്ന് കമ്പനി അവസാനമായി ഉറപ്പ് നല്‍കിയിട്ടുണ്ടെങ്കിലും ഇതില്‍ യാതൊരു വിശ്വാസവുമില്ലെന്ന് ജീവനക്കാര്‍ പറയുന്നു. ഇതിനുമുമ്പും പലതവണ സമാനമായ രീതിയില്‍ കമ്പനി തീയതികള്‍ മാറ്റിപ്പറഞ്ഞ് പറ്റിച്ചിട്ടുണ്ട്. കഴിഞ്ഞ വര്‍ഷം മുതല്‍ കുടിശ്ശിക തീര്‍ക്കുമെന്ന് പറയുന്ന മാനേജ്‌മെന്റ്, മെയ് പതിനഞ്ചിനകം പണം തരുമെന്ന് ഉറപ്പുനല്‍കിയ ഘട്ടവുമുണ്ടായിരുന്നു. തുടര്‍ച്ചയായി വാഗ്ദാനങ്ങള്‍ ലംഘിക്കപ്പെടുന്ന സാഹചര്യത്തിലാണ് ജീവനക്കാര്‍ പരസ്യ പ്രതിഷേധവുമായി രംഗത്തെത്തിയത്.
രണ്ടായിരത്തിപ്പതിനേഴ് മുതല്‍ പ്രവര്‍ത്തനം ആരംഭിച്ച കമ്പനി രണ്ടായിരത്തി ഇരുപതോടെയാണ് വലിയ തോതില്‍ ജീവനക്കാരെ റിക്രൂട്ട് ചെയ്തത്. വര്‍ഷങ്ങളായി സ്ഥാപനത്തിന് വേണ്ടി പ്രയത്നിച്ച തങ്ങളെ, യാതൊരു മുന്നറിയിപ്പുമില്ലാതെയും അര്‍ഹമായ ആനുകൂല്യങ്ങള്‍ നല്‍കാതെയും തെരുവിലേക്ക് തള്ളിവിട്ട കമ്പനിക്കെതിരെ ശക്തമായ നിയമനടപടികളുമായി മുന്നോട്ട് പോകാനാണ് ജീവനക്കാരുടെ തീരുമാനം.
