ഫ്ലോറിഡ: യു.എസിലെ ഫ്ലോറിഡയിൽ ഗൃഹനാഥൻ വീടിന്റെ മുൻവാതിൽ തുറന്നപ്പോൾ ഞെട്ടിക്കുന്ന കാഴ്ചയാണ് അയാളെ കാത്തിരുന്നത്. വാതിലിന് പുറത്ത് ഗൃഹനാഥനെ കാത്തിരുന്നത് 9 അടി നീളമുള്ള ഒരു ചീങ്കണ്ണിയാണ്. കാത്തിരിക്കുക മാത്രമല്ല വാതിൽ തുറന്ന ഗൃഹനാഥന്റെ കാലിൽ ചീങ്കണ്ണി കടിക്കുകയും ചെയ്തു.
ഡേടോണ ബീച്ച് നിവാസിയായ സ്കോട്ട് ഹോളിംസ്വർത്തിനാണ് ഈ ദുരനുഭവം ഉണ്ടായിരിക്കുന്നത്. രാത്രി സ്കോട്ട് ഹോളിംസ്വർത്തും ഭാര്യയും ടി.വി കാണുകയായിരുന്നു. വാതിക്കൽ ശബ്ദം കേട്ട് എന്താണെന്നു നോക്കാൻ ചെന്നപ്പോഴാണ് സംഭവം അരങ്ങേറുന്നത്. വാതിൽ തുറന്ന് വരാന്തയിലെ ലൈറ്റ് ഓണാക്കുന്നതിന് മുൻപ് തന്നെ ചീങ്കണ്ണി സ്കോട്ട് ഹോളിംസ്വർത്തിന്റെ തുടയുടെ മുകൾ ഭാഗത്ത് മുറുകെ കടിച്ചു. ആകെ അമ്പരപ്പും ഞെട്ടലും മാത്രമായിരുന്നു ഉണ്ടായതെന്ന് സ്കോട്ട് ഹോളിംസ്വർത്ത് പറയുന്നു. തുടർന്ന് ആശുപത്രിയിൽ പ്രവേശിപ്പിച്ച സ്കോട്ട് ഹോളിംസ്വർത്ത് ഇപ്പോൾ സുഖം പ്രാപിച്ച് വരുന്നതായി ആശുപത്രി അധികൃതർ പറയുന്നു.