പാലക്കാട് : പ്രശസ്ത സംഗീതജ്ഞനും സംഗീത സംവിധായകനുമായ പി.കെ കേശവൻ നമ്പൂതിരി (84) അന്തരിച്ചു. ഇന്ന് പുലർച്ചെ നാല് മണിയോടെ തൃശൂരിലെ വസതിയിലായിരുന്നു അന്ത്യം. കൃഷ്ണഭക്തി തുളുമ്പുന്ന ഗാനങ്ങൾക്ക് ഈണംനൽകിയ മലയാളിയുടെ മനസിൽ തന്റേതായ ഒരിടം കണ്ടെത്തിയ അദ്ദേഹം ഭക്തിഗാനരംഗത്ത് ഏറെ ശ്രദ്ധേയനായിരുന്നു.
സംഗീത കാസറ്റ്സ് പുറത്തിറക്കിയ പുഷ്പാഞ്ജലി (1981) തരംഗിണിയുടെ വനമാല (1983) തുടങ്ങി കേശവൻ നമ്പൂതിരി സംഗീതം നിർവഹിച്ച കാസറ്റുകൾ എക്കാലത്തെയും ഹിറ്റുകളായാണ് കണക്കാക്കുന്നത് . അദ്ദേഹത്തിന്റെ വിഘ്നേശ്വരാ ജന്മ നാളികേരം, വടക്കുംനാഥന് സുപ്രഭാതം പാടും, ഗുരുവായൂരമ്പലം ശ്രീവൈകുണ്ഠം, മൂകാംബികേ ഹൃദയ താളാഞ്ജലി, അമ്പാടി തന്നിലൊരുണ്ണി, നെയ്യാറ്റിൻകര വാഴും എന്നിവ കേരളീയർ എന്നും ഓർത്ത് കേൾക്കുന്ന ഭക്തിഗാനങ്ങളാണ്.
യേശുദാസ്, ജയചന്ദ്രൻ, സുജാത തുടങ്ങി മലയാള സംഗീതലോകത്തെ പ്രമുഖർ അദ്ദേഹം ഈണംനൽകിയ ഗാനങ്ങൾ ആലപിച്ചിട്ടുണ്ട്. ഭക്തിഗാനങ്ങൾക്ക് പുറമെ നിരവധി ലളിതഗാനങ്ങൾക്കും അദ്ദേഹം സംഗീതം പകർന്നു. തൃശൂർ ആകാശവാണി നിലയത്തിൽ നിന്ന് 1998-ലാണ് അദ്ദേഹം വിരമിച്ചത്.
