അഹമ്മദാബാദ് : അമ്മ ഹീരാബെന്നിനെ കാണാനായി പ്രധാനമന്ത്രി നരേന്ദ്രമോദി അഹമ്മദാബാദ് യുഎൻ മേത്ത ഇൻസ്റ്റിറ്റ്യൂട്ട് ഓഫ് കാർഡിയോളജി & റിസർച്ച് സെന്ററിൽ എത്തി. ഗുജറാത്ത് മുഖ്യമന്ത്രി ഭൂപേന്ദ്ര പട്ടേൽ, ചീഫ് പ്രിൻസിപ്പൽ സെക്രട്ടറി കെ കൈലാഷ്നാഥൻ ആരോഗ്യമന്ത്രി ഋഷികേശ് പട്ടേൽ, ആഭ്യന്തര സഹമന്ത്രി ഹർഷ് സാംഘ്വി എന്നിവർ ഹീരാബെന്നിന്റെ ആരോഗ്യനിലയെക്കുറിച്ച് അന്വേഷിക്കാൻ നേരത്തെ തന്നെ ആശുപത്രിയിലെത്തിയിരുന്നു.
വൈകുന്നേരം 4 മണിയോടെ ആശുപത്രിയിൽ എത്തിയ പ്രധാന മന്ത്രി ഡോക്ടർമാരുമായി അമ്മയുടെ ആരോഗ്യനിലയെ കുറിച്ച് സംസാരിച്ചു. ജീവനക്കാരൊഴികെ മാറ്റാരെയും പ്രവേശിപ്പിക്കാതെ പഴുതടച്ച സുരക്ഷയാണ് ആശുപത്രിയിൽ ഒരുക്കിയിരിക്കുന്നത്
നിലവിൽ ഹീരാബെന്നിന്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.വാർധക്യ അവശതകളെത്തുടർന്നാണ് ഇന്ന് രാവിലെ ഹീരാബെന്നിനെ ആശുപത്രിയിലാക്കിയത്.
