നാഗ്പുര്‍: അടിച്ചമര്‍ത്തപ്പെട്ടവര്‍ക്കും ദളിതര്‍ക്കും സാമൂഹികമായും സാമ്പത്തികമായും പിന്നാക്കം നില്‍ക്കുന്നവര്‍ക്കും സംവരണം നിര്‍ബന്ധമാണെന്ന് കേന്ദ്രമന്ത്രി നിതിന്‍ ഗഡ്കരി. എന്നാലും സംവരണം കൊണ്ട് മാത്രം സമുദായങ്ങള്‍ രക്ഷപ്പെടില്ലെന്നും ഗഡ്കരി പറഞ്ഞു.
മഹാത്മാ ഫുലെ എഡുക്കേഷന്‍ സൊസൈറ്റിയുടെ 60 ആം വാര്‍ഷികം ഉദ്ഘാടനം ചെയ്യുകയായിരുന്നു അദ്ദേഹം. ഈ ചടങ്ങില്‍ വച്ച് മാലി സമുദായാംഗങ്ങള്‍ വരാനിരിക്കുന്ന മഹാരാഷ്ട്ര സംസ്ഥാന നിയമസഭാ തിരഞ്ഞെടുപ്പില്‍ തങ്ങളുടെ ആളുകള്‍ക്ക് കൂടുതല്‍ സീറ്റ് നല്‍കണമെന്ന് പറഞ്ഞു. ഇതിന് മറുപടിയായാണ് കേന്ദ്രമന്ത്രിയുടെ പ്രസ്താവന.
‘മികവിലൂടെ സ്ഥാനങ്ങള്‍ നേടാന്‍ സാധിക്കാതെ വരുമ്പോഴാണ് ആളുകള്‍ ജാതി കാര്‍ഡ് പുറത്തെടുക്കുന്നത്,’ എന്ന് അദ്ദേഹം കുറ്റപ്പെടുത്തി. ഇന്ദിരാഗാന്ധി അധികാരത്തിലെത്തിയത് അവരുടെ ജാതിയുടെ ഗുണം കൊണ്ടല്ല. രാജസ്ഥാനില്‍ അശോക് ഗെഹ്ലോട്ട് മുഖ്യമന്ത്രിയായത് എല്ലാ ജാതിക്കാരുടെയും പിന്തുണ കൊണ്ടാണ്,’ ഗഡ്കരി പറഞ്ഞു.
മുന്‍പ് പലരും സ്ത്രീകള്‍ക്ക് സംവരണം വേണമെന്നാണ് എന്നോട് പറഞ്ഞത്. ‘ശരിയാണ്, അവര്‍ക്കത് തീര്‍ച്ചയായും കിട്ടണം. ഇന്ദിരാഗാന്ധിക്ക് സംവരണം ലഭിച്ചിരുന്നോയെന്ന് ഞാന്‍ ഉടന്‍ തന്നെ അവരോട് ചോദിച്ചു. നിരവധി വര്‍ഷങ്ങള്‍ അവര്‍ രാജ്യം ഭരിച്ചു, പ്രശസ്തയായി. വസുന്ധര രാജെയ്ക്കും സുഷമ സ്വരാജിനും സംവരണം ലഭിച്ചിരുന്നോയെന്ന് ഗഡ്കരിചോദിച്ചു
‘സംവരണം ലഭിക്കേണ്ടത് അടിച്ചമര്‍ത്തപ്പെട്ടവര്‍ക്കും ദളിതര്‍ക്കും സാമൂഹികമായും സാമ്പത്തികമായും പിന്നാക്കം നില്‍ക്കുന്നവര്‍ക്കുമാണ്. സംവരണം കൊണ്ട് സമുദായം രക്ഷപ്പെടുമെന്ന് ആരെങ്കിലും പറഞ്ഞാല്‍ അത് ശരിയല്ല. കൂടുതല്‍ സംവരണം ലഭിച്ച സമുദായും പുരോഗതി പ്രാപിച്ചെന്ന വാദവും തെറ്റാണ്,’ എന്നും ഗഡ്കരി പറഞ്ഞു.
