ന്യൂഡല്‍ഹി: ഖാദി വകുപ്പ് ചാണകത്തില്‍ നിന്നും വികസിപ്പിച്ചെടുത്ത ഖാദി പ്രകൃതിക് പെയിൻറ് കേന്ദ്രമന്ത്രി നിതിന്‍ ഗഡ്കരി ഇന്ന് പുറത്തിറക്കും. ഒരുപാട് ഗുണങ്ങളോടെയാണ് ഇത് വികസിപ്പിച്ചെടുത്തതെന്നു ഖാദി വകുപ്പ് അറിയിച്ചു. ബാക്ടീരിയയെയും പൂപ്പലിനെയും പ്രതിരോധിക്കുന്നതാണ് ഇതിന്റെ ഏറ്റവും വലിയ പ്രത്യകത. അതുപോലെ തന്നെ മണമില്ലാത്തതും ഇതിന്റെ മറ്റൊരു പ്രത്യകതയാണ്. ഖാദി പ്രകൃതിക് പെയിന്റിന് ബി.ഐ.എസ്. അഗീകാരം ലഭിച്ചിട്ടുണ്ടെന്നും ഗഡ്കരിയുടെ ഓഫീസ് പ്രസ്താവനയില്‍ അറിയിച്ചു. ബാക്ടീരിയയെയും പൂപ്പലിനെയും പ്രതിരോധിക്കുന്ന മറ്റു പെയിന്റുകളെക്കാൾ വിലക്കുറവാണ് ഖാദി പ്രകൃതിക് പെയിന്റ്ന്.
2020 മാര്‍ച്ചിലാണ് ഇത്തരമൊരു പദ്ധതി കെ.വി.ഐ.സി. മുന്നോട്ടുവെച്ചത്. ജയ്പുരിലെ കെ.വി.ഐ.സി. യൂണിറ്റായ കുമരപ്പ നാഷണല്‍ ഹാന്‍ഡ്മേഡ് പേപ്പര്‍ ഇന്‍സ്റ്റിറ്റ്യൂട്ട് ആണ് ഖാദി പ്രകൃതിക് പെയിന്റ് വികസിപ്പിച്ചെടുത്തത്. രണ്ടുവിധത്തിലാണ് ഖാദി പ്രകൃതിക് പെയിന്റ് ലഭ്യമാകുന്നത്. ഡിസ്റ്റംപര്‍ പെയിന്റ്, പ്ലാസ്റ്റിക് എമല്‍ഷന്‍ പെയിന്റ്. ലെഡ്, മെര്‍ക്കുറി, ക്രോമിയം, ആഴ്സെനിക്, കാഡ്മിയം തുടങ്ങിയ ഘനലോഹങ്ങളുടെ സാന്നിധ്യം ഖാദി പ്രകൃതിക് പെയിന്റില്‍ ഇല്ലെന്ന് കെ.വി.ഐ.സി. പറഞ്ഞു.
