ഒമിക്രോണ് കേസുകള് കൂടി വരുന്ന സാഹചര്യത്തില് പുതുവര്ഷാഘോഷങ്ങള് കരുതലോടെ വേണമെന്ന് ആരോഗ്യ മന്ത്രി വീണാ ജോര്ജ്. സംസ്ഥാനത്ത് പുതുവര്ഷത്തോടനുബന്ധിച്ച് രാത്രി നിയന്ത്രണങ്ങള് ഏര്പ്പെടുത്തിയിട്ടുണ്ട്. ഇതുകൂടാതെ കടകള്, ഷോപ്പിംഗ് മാളുകള്, ഹോട്ടലുകള്, ആരാധനാലയങ്ങള് എന്നിവിടങ്ങളില് പോകുന്നവരും ജാഗ്രത പുലര്ത്തണം.
ഹൈ റിസ്ക് രാജ്യങ്ങളില് നിന്നും വന്ന 30 പേര്ക്കും ലോ റിസ്ക് രാജ്യങ്ങളില് നിന്നും വന്ന 25 പേര്ക്കും ഒമിക്രോണ് ബാധിച്ചു. 8 പേര്ക്കാണ് സമ്പര്ക്കത്തിലൂടെ രോഗം ബാധിച്ചത്. അതിനാല് തന്നെ അതീവ ജാഗ്രത പാലിക്കണമെന്നും മന്ത്രി അഭ്യര്ത്ഥിച്ചു. ഗുരുതരാവസ്ഥ കുറവാണെങ്കിലും ചുരുങ്ങിയ ദിവസങ്ങള് കൊണ്ട് വളരെ വേഗത്തില് പടര്ന്നു പിടിക്കുന്ന കോവിഡിന്റെ ജനിതക വകഭേദമാണ് ഒമിക്രോണ്. വ്യാപനം വളരെ കൂടുതലായതിനാല് സംസ്ഥാനത്തെ സംബന്ധിച്ച് അത് വളരെ നിര്ണായകമാണ്. രോഗലക്ഷണങ്ങളുള്ളവര് യാതൊരു കാരണവശാലും പൊതുയിടങ്ങള് സന്ദര്ശിക്കുകയോ പൊതുചടങ്ങുകളില് പങ്കെടുക്കുകയോ ചെയ്യരുതെന്നും മന്ത്രി കൂട്ടിച്ചേർത്തു.

