ശ്രീനഗർ : ജമ്മു കശ്മീരിലെ നിയന്ത്രണരേഖയ്ക്ക് സമീപം വീണ്ടും പാക് ഡ്രോണുകളുടെ സാന്നിധ്യം. രജൗരി ജില്ലയിലെ തേരി സെക്ടറിലുള്ള ദുംഗ ഗലി മേഖലയിലാണ് ഇന്നലെ വൈകുന്നേരത്തോടെ സംശയാസ്പദമായ രീതിയിൽ ഡ്രോണുകൾ പറക്കുന്നത് സൈന്യത്തിന്റെ ശ്രദ്ധയിൽപ്പെട്ടത്. ഉടൻ തന്നെ ഇന്ത്യൻ സൈന്യം ഡ്രോണുകൾക്ക് നേരെ വെടിയുതിർക്കുകയും പ്രതിരോധ നടപടികൾ ശക്തമാക്കുകയും ചെയ്തു. സൈന്യത്തിന്റെ ശക്തമായ തിരിച്ചടിയെത്തുടർന്ന് ഡ്രോണുകൾ പാക് അതിർത്തിക്കുള്ളിലേക്ക് തന്നെ പിൻവാങ്ങി.
ഇന്നലെ വൈകുന്നേരം 6:35 ഓടെ ഗനിയ-കൽസിയാൻ ഗ്രാമത്തിന് മുകളിലും തുടർന്ന് 7:35 ഓടെ നേരി ധാര ഗ്രാമത്തിന് മുകളിലുമാണ് താഴ്ന്നു പറക്കുന്ന ഡ്രോണുകൾ കണ്ടെത്തിയത്. അതിർത്തി കടന്നെത്തിയ ഈ ഡ്രോണുകളെ തുരത്താൻ സൈന്യം നടത്തിയ വെടിവെപ്പ് പ്രദേശവാസികളിലും ജാഗ്രതയുണ്ടാക്കി. ജാംഗഡ്, കലാല് മേഖലകളിൽ വ്യാപകമായ വെടിവെപ്പ് നടന്നതായും സൈന്യത്തിന്റെ അതീവ ജാഗ്രത കാരണമാണ് തങ്ങൾ സുരക്ഷിതരായിരിക്കുന്നതെന്നും പ്രാദേശിക നിവാസികൾ പ്രതികരിച്ചു. സംഭവത്തെത്തുടർന്ന് അതിർത്തി മേഖലകളിൽ നിരീക്ഷണം ശക്തമാക്കിയ സൈന്യം, ഡ്രോണുകൾ വഴി ആയുധങ്ങളോ മയക്കുമരുന്നോ കടത്തിയിട്ടുണ്ടോ എന്ന് പരിശോധിക്കാൻ തിരച്ചിൽ ഊർജ്ജിതമാക്കിയിട്ടുണ്ട്.
പാകിസ്ഥാന്റെ ഭാഗത്തുനിന്നുള്ള ഇത്തരം പ്രകോപനങ്ങൾക്കെതിരെ കരസേനാ മേധാവി ജനറൽ ഉപേന്ദ്ര ദ്വിവേദി ശക്തമായ മുന്നറിയിപ്പ് നൽകി. ഭീകരവാദ കേന്ദ്രങ്ങളെ ലക്ഷ്യമിട്ട് നടത്തുന്ന ‘ഓപ്പറേഷൻ സിന്ദൂർ’ തുടരുകയാണെന്നും അതിർത്തി കടന്നുള്ള ഏത് സാഹസത്തിനും പാകിസ്താൻ വലിയ വില നൽകേണ്ടി വരുമെന്നും അദ്ദേഹം വ്യക്തമാക്കി. അതിർത്തിയിൽ ഭീകരർക്ക് നുഴഞ്ഞുകയറാൻ ഒരിടവും സൈന്യം ബാക്കിവെച്ചിട്ടില്ലെന്നും ഡ്രോൺ പ്രവർത്തനങ്ങൾ അംഗീകരിക്കാനാവില്ലെന്നും അദ്ദേഹം കൂട്ടിച്ചേർത്തു. പാക് സൈനിക അധികൃതരെ ഇന്ത്യയുടെ കർശന നിലപാട് ഇതിനോടകം അറിയിച്ചിട്ടുണ്ട്.
കഴിഞ്ഞ കുറച്ച് ദിവസങ്ങളായി പൂഞ്ച്, രജൗരി ജില്ലകളിൽ ഡ്രോൺ സാന്നിധ്യം വർധിച്ചു വരുന്നത് സുരക്ഷാ ഏജൻസികളെ ആശങ്കയിലാക്കുന്നുണ്ട്. ജനുവരി 12-നും സമാനമായ രീതിയിൽ വിവിധയിടങ്ങളിൽ ഡ്രോണുകൾ കണ്ടെത്തിയിരുന്നു.അതിനിടെ, കത്വയിലെ വനമേഖലയിൽ ഭീകരരുടെ സാന്നിധ്യമുണ്ടെന്ന വിവരത്തെത്തുടർന്ന് സൈന്യം തിരച്ചിൽ തുടരുകയാണ്. 2025-ൽ മാത്രം ഇതുവരെ 31 ഭീകരരെ സൈന്യം വധിച്ചിട്ടുണ്ടെന്നും ഇതിൽ ഭൂരിഭാഗവും പാക് പൗരന്മാരാണെന്നും സൈനിക വൃത്തങ്ങൾ അറിയിച്ചു.
