കാബൂളിലെ ഇരട്ട സ്‌ഫോടനം താലിബാൻ ചോദിച്ചു വാങ്ങിയത്; ആക്രമണത്തിന്റെ ആസൂത്രണം നടന്നത് പാകിസ്ഥാനിൽ; ഞെട്ടിപ്പിക്കുന്ന വിവരങ്ങൾ പുറത്ത്

കാബൂൾ: കാബൂളിലെ ഇരട്ട സ്‌ഫോടനവുമായി ബന്ധപ്പെട്ട് ഞെട്ടിപ്പിക്കുന്ന വിവരങ്ങൾ പുറത്ത്. കാബൂളിലെ ചാവേർ ആക്രമണങ്ങൾ ആസൂത്രണം ചെയ്തത് പാകിസ്ഥാനിൽ ആണെന്നും, ഐസിസിന്റെ പ്രധാന മുഖങ്ങളിലൊന്നായ മാവലാവി ഫാറൂഖിയാണ് ചാവേർ ആക്രമണങ്ങളുടെ മുഖ്യ സൂത്രധാരനാണെന്നുമാണ് റിപ്പോർട്ടുകൾ വ്യക്തമാക്കുന്നത്.

അതേസമയം താലിബാൻ ശരിക്കും വിലകൊടുത്തുവാങ്ങിയതാണ് ഈ ചാവേർ ആക്രമണമെന്നതാണ് സത്യം. രാജ്യത്തിന്റെ അധികാരം പിടിച്ചപ്പോൾ നിരവധി ഭീകരരെ ജയിലിൽ നിന്ന് താലിബാൻ മോചിപ്പിച്ചിരുന്നു. അതിൽ ഒരാളായിരുന്നു ഫാറൂഖിയും. ജയിലിൽ നിന്നും രക്ഷപ്പെട്ടതോടെ ഇയാൾ സുരക്ഷിതമായി പാകിസ്ഥാനിലെത്തി, ചാവേർ ആക്രമണങ്ങൾ നടത്താനുളള പദ്ധതികൾ ആസൂത്രണം ചെയ്യുകയായിരുന്നു. കഴിഞ്ഞവർഷം 27പേരുടെ മരണത്തിനിടയാക്കിയ കാബൂളിലെ ഗുരുദ്വാര ആക്രമണത്തിന് പിന്നിലും ഇയാളായിരുന്നു. ആക്രമണത്തിൽ തനിക്ക് പങ്കുണ്ടെന്ന് ഇയാൾ സമ്മതിക്കുകയും ചെയ്തിരുന്നു.

ഫാറൂഖി പാകിസ്ഥാനിലെ സൈനിക, ഭരണ തലത്തിലെ ഉന്നതരുമായി നല്ല ബന്ധത്തിലാണ്. ഗുരുദ്വാര ആക്രമണത്തിന് ഈ ബന്ധം ഇയാൾ ഉപയോഗിച്ചിരുന്നു. എന്തിനും മടിക്കാത്ത കൊടും ഭീകരനാണ് ഫാറൂഖി. ലഷ്കർ ഇ തയ്ബ അംഗമായിരുന്ന അയാൾ പിന്നീട് തെഹ്‌രിക് ഇ താലിബാനിൽ അംഗമായി. പിന്നീടാണ് ഐസിസിലെത്തുന്നത്.

അതേസമയം കഴിഞ്ഞ ദിവസം കാബൂൾ വിമാനത്താവളത്തിന് പുറത്തുണ്ടായ സ്‌ഫോടനത്തിൽ കൊല്ലപ്പെട്ടവരുടെ എണ്ണം 90 ആയി. 13 അമേരിക്കൻ സൈനികരും കൊല്ലപ്പെട്ടു. പതിനഞ്ച് അമേരിക്കൻ സൈനികർ ഉൾപ്പെടെ ഒട്ടേറെ പേർക്ക് പരിക്കേൽക്കുകയും ചെയ്തിരുന്നു.

കാബൂൾ വിമാനത്താവളത്തിലെ ആബെ ഗേറ്റിന് സമീപമാണ് ആദ്യ സ്ഫോടനം ഉണ്ടായത്. ഇത് മൂന്നാം തവണയാണ് വിമാനത്താവളത്തിന് പുറത്ത് സ്ഫോടനമുണ്ടാകുന്നത്. സ്‌ഫോടനത്തിൽ കുട്ടികളും താലിബാൻ തീവ്രവാദികളും കൊല്ലപ്പെട്ടിരുന്നു. എന്നാൽ കാബൂളിൽ ഭീകരർ നടത്തിയ ആക്രമണത്തെ ഇന്ത്യയുൾപ്പെടെ വിവിധ ലോകരാഷ്ട്രങ്ങൾ അപലപിച്ചു. ലോകം ഒറ്റക്കെട്ടായി ഭീകരതയ്‌ക്കെതിരെ അണി നിരക്കണമെന്ന സന്ദേശമാണ് കാബൂളിലെ ചാവേർ ആക്രമണം നൽകുന്നതെന്ന് കേന്ദ്രവിദേശകാര്യമന്ത്രാലയം വ്യക്തമാക്കി.

പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona