പയ്യന്നൂരിലെ രാഷ്ട്രീയ കേന്ദ്രങ്ങളെ പിടിച്ചുകുലുക്കിക്കൊണ്ട് രക്തസാക്ഷി ഫണ്ട് തട്ടിപ്പ് ആരോപണത്തിൽ നിർണ്ണായക തെളിവുകൾ പുറത്തുവിട്ട് മുൻ സിപിഎം നേതാവും നിലവിൽ സ്വതന്ത്ര സ്ഥാനാർത്ഥിയുമായ വി. കുഞ്ഞികൃഷ്ണൻ . ഫണ്ട് തിരിമറിയുമായി ബന്ധപ്പെട്ട നിർണ്ണായക ബാങ്ക് രേഖകളാണ് അദ്ദേഹം പരസ്യപ്പെടുത്തിയത്. രക്തസാക്ഷി ഫണ്ടിൽ നിന്നും അഞ്ച് ലക്ഷം രൂപ ഏരിയ സെക്രട്ടറി സ്വന്തം പേരിലേക്ക് മാറ്റിയെന്ന ഗുരുതരമായ ആരോപണം ശരിവെക്കുന്ന വിവരങ്ങളാണ് ഇപ്പോൾ പുറത്തുവന്നിരിക്കുന്നത്. തന്റെ ഫേസ്ബുക്ക് പോസ്റ്റിലൂടെ ബാങ്ക് ഇടപാടുകളുടെ വിശദാംശങ്ങൾ പങ്കുവെച്ച കുഞ്ഞികൃഷ്ണൻ, അഴിമതിക്കാരെ സംരക്ഷിക്കുന്ന പാർട്ടി നിലപാടിനെതിരെ ശക്തമായ കടന്നാക്രമണമാണ് നടത്തിയത്.
രക്തസാക്ഷി കുടുംബങ്ങളെ സഹായിക്കാൻ സമാഹരിച്ച തുക വ്യക്തിപരമായ ആവശ്യങ്ങൾക്കായി വകമാറ്റിയെന്നും ഇത് മറച്ചുവെക്കാൻ ഭവന നിർമ്മാണത്തിന് ചിലവഴിച്ചുവെന്ന തരത്തിൽ കള്ളരേഖകൾ ചമച്ചതായും കുഞ്ഞികൃഷ്ണൻ ആരോപിക്കുന്നു. സിപിഎം നേതൃത്വം ഈ വിഷയത്തിൽ സ്വീകരിച്ച പ്രതിരോധ നിലപാടുകളെ പാടേ തള്ളുന്നതാണ് ഇപ്പോൾ പുറത്തുവന്ന രേഖകൾ. വരും ദിവസങ്ങളിൽ കൂടുതൽ തെളിവുകൾ പുറത്തുവിടുമെന്നും അഴിമതിക്കെതിരെയുള്ള തന്റെ പോരാട്ടം തുടരുമെന്നും അദ്ദേഹം വ്യക്തമാക്കിയിട്ടുണ്ട്. പയ്യന്നൂരിലെ ജനങ്ങൾ ഈ വസ്തുതകൾ കൃത്യമായി വിലയിരുത്തുമെന്നും യഥാർത്ഥ അഴിമതിക്കാർ ആരാണെന്ന് വോട്ടർമാർ തിരിച്ചറിയുമെന്നും അദ്ദേഹം കുറിച്ചു.
തെരഞ്ഞെടുപ്പ് ആസന്നമായിരിക്കെ, പയ്യന്നൂരിലെ മുൻ പ്രമുഖ നേതാവ് തന്നെ ഇത്തരത്തിൽ രേഖകൾ സഹിതം രംഗത്തെത്തിയത് സിപിഎമ്മിന് വലിയ തലവേദനയാണ് സൃഷ്ടിച്ചിരിക്കുന്നത്. പാർട്ടി അച്ചടക്ക നടപടി നേരിട്ടിട്ടും തന്റെ നിലപാടുകളിൽ ഉറച്ചുനിൽക്കുന്ന വി. കുഞ്ഞികൃഷ്ണന്റെ നീക്കം മണ്ഡലത്തിലെ രാഷ്ട്രീയ സമവാക്യങ്ങളെ ബാധിച്ചേക്കാം. അഴിമതി ആരോപണങ്ങളിൽ പാർട്ടി ഔദ്യോഗികമായി എന്ത് വിശദീകരണം നൽകുമെന്നാണ് ഇപ്പോൾ രാഷ്ട്രീയ കേരളം ഉറ്റുനോക്കുന്നത്.
