പാറ്റ്‌ന :ഫുൽവാരിഷരീഫ് പിഎഫ്ഐ കേസിലെ പ്രധാന പ്രതിയെ അറസ്റ്റ് ചെയ്ത് എൻഐഎ. ബിഹാറിലെ ഈസ്റ്റ് ചമ്പാരൻ ജില്ലയിൽ നിന്നുള്ള മുഹമ്മദ് സജാദ് ആലമിനെയാണ് അന്വേഷണസംഘം അറസ്റ്റ് ചെയ്തത്. ഇയാൾ ദുബായിൽ നിന്ന് ദില്ലിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ വന്നിറങ്ങവേയായിരുന്നു അറസ്റ്റ് .
നിരോധിത പോപ്പുലർ ഫ്രണ്ട് ഓഫ് ഇന്ത്യയുടെ (പിഎഫ്ഐ) പരിശീലനം ലഭിച്ച കേഡറായ മുഹമ്മദ് സജാദ് ആലമിനെതിരെ പാറ്റ്നയിലെ എൻഐഎ പ്രത്യേക കോടതി അറസ്റ്റ് വാറണ്ട് പുറപ്പെടുവിച്ചിരുന്നു. കൂടാതെ ഇയാൾക്കെതിരെ ലുക്ക് ഔട്ട് സർക്കുലറും പുറപ്പെടുവിച്ചിരുന്നു.എൻഐഎ പറയുന്നതനുസരിച്ച് യുഎഇ, കർണാടക, കേരളം ആസ്ഥാനമായുള്ള സിൻഡിക്കേറ്റ് വഴി ദുബായിൽ നിന്ന് ബിഹാറിലെ പിഎഫ്ഐ കേഡറുകളിലേക്ക് അനധികൃത പണം എത്തിക്കുന്നതിൽ സജാദിന് പങ്കുണ്ട്. നിരോധിത സംഘടനയുടെ ക്രിമിനൽ, നിയമവിരുദ്ധ പ്രവർത്തനങ്ങൾ പ്രോത്സാഹിപ്പിക്കാനാണ് ഫണ്ട് ഉപയോഗിച്ചത്.
സംഭവത്തിൽ ഫുൽവാരിഷരീഫ് പോലീസാണ് 2022 ജൂലൈയിൽ ആദ്യമായി രജിസ്റ്റർ ചെയ്തത്. രാജ്യത്തെ സമാധാനവും സൗഹാർദവും തകർക്കുന്നതിനും ഭീകരാന്തരീക്ഷം സൃഷ്ടിക്കാനും മതസ്പർദ്ധ വളർത്താനും കേഡർമാർ ഗൂഢാലോചന നടത്തിയെന്നാണ് എഫ്‌ഐആർ. കേസ് രജിസ്റ്റർ ചെയ്ത് ദിവസങ്ങൾക്ക് ശേഷം അന്വേഷണം ഏറ്റെടുത്ത എൻഐഎ കേസിൽ 17 പ്രതികളെ നേരത്തെ അറസ്റ്റ് ചെയ്യുകയും കുറ്റപത്രം സമർപ്പിക്കുകയും ചെയ്തിരുന്നു.
