തൃശൂര്‍: കാഞ്ഞാണിയിൽ അംബേദ്കര്‍ അനുസ്മരണം പോലീസ് തടഞ്ഞു. കാഞ്ഞാണിയില്‍ ദലിത് കോണ്‍ഗ്രസിന്റെ ആഭിമുഖ്യത്തിൽ നടത്താന്‍ നിശ്ചയിച്ച അനുസ്മരണ പരിപാടിയാണ് നിര്‍ത്തിവയ്ക്കാന്‍ പോലീസ് ആവശ്യപ്പെട്ടത്. നവകേരള സദസിനെതിരായ പ്രതിഷേധമായി തെറ്റിദ്ധരിച്ചാണ് പോലീസ് നടപടിയെന്നാണ് പ്രവര്‍ത്തകരുടെ പരാതി.
തുടര്‍ന്ന് പ്രതിഷേധപ്രകടനം നടത്തിയ പ്രവര്‍ത്തകര്‍ റോഡില്‍ കുത്തിയിരുന്നു. മാല ചാര്‍ത്തിയ അംബേദ്കറുടെ ഛായാചിത്രവുമായിട്ടായിരുന്നു പ്രവര്‍ത്തകരുടെ പ്രതിഷേധം. പ്രതിഷേധതത്തില്‍ പങ്കെടുത്ത സ്ത്രീകളടക്കമുള്ള പ്രവര്‍ത്തകരെ പോലീസ് കസ്റ്റഡിയിലെടുത്തു. അംബേദ്കര്‍ അനുസ്മരണ പരിപാടി മുന്‍കൂട്ടി നിശ്ചയിച്ചതാണെന്നും നവകേരള സദസിനെതിരായ പ്രതിഷേധമല്ലെന്നും പറഞ്ഞിട്ടും അതിനൊന്നും ചെവി കൊടുക്കാതെ പ്രവര്‍ത്തകരെ വലിച്ചിഴച്ചാണ് പോലീസ് ജീപ്പില്‍ കയറ്റിയത്.
