കോട്ടയം : മുൻ മുഖ്യമന്ത്രി ഉമ്മൻ ചാണ്ടിയുടെ നിര്യാണത്തെ തുടർന്ന് ഒഴിവ് വന്ന പുതുപ്പള്ളി നിയമസഭാ മണ്ഡലത്തിൽ സെപ്റ്റംബർ അഞ്ചിന് നടക്കുന്ന ഉപതെരഞ്ഞെടുപ്പിൽ എല്ഡിഎഫ് സ്ഥാനാർത്ഥിയെ 12-ന് കോട്ടയത്ത് പ്രഖ്യാപിക്കും. സിപിഎം നേതാവും മന്ത്രിയുമായ വി.എന് വാസവനാണ് ഇക്കാര്യം വ്യക്തമാക്കിയത്. അതെ സമയം ഉപതെരഞ്ഞെടുപ്പിലെ യുഡിഎഫ് സ്ഥാനാർത്ഥിയെ ഇന്നലെ പ്രഖ്യാപിച്ചിരുന്നു. ഉമ്മൻ ചാണ്ടിയുടെ മകൻ ചാണ്ടി ഉമ്മനെയാണ് യുഡിഎഫ് മുന്നണി സ്ഥാനാർത്ഥിയായി പ്രഖ്യാപിച്ചത്. ദില്ലിയിൽ കെപിസിസി അദ്ധ്യക്ഷൻ കെ.സുധാകരനാണ് ചാണ്ടി ഉമ്മന്റെ പേര് പ്രഖ്യാപിച്ചത്.
“തൃക്കാക്കര മോഡല് കോട്ടയത്ത് നടക്കില്ല. ചരിത്രം അതാണ്. സഹതാപത്തെ മറികടക്കാന് കഴിയുന്ന രാഷ്ട്രീയ സാഹചര്യം കോട്ടയത്തുണ്ട്. പുതുപ്പള്ളി ശക്തമായ സംഘടനാ അടിത്തറയുള്ള മണ്ഡലമാണ്.
പുതുപ്പള്ളിയിലെ എല്ഡിഎഫ് സ്ഥാനാര്ഥിയെ 12-ന് കോട്ടയത്ത് പ്രഖ്യാപിക്കും. പാര്ട്ടി സെക്രട്ടറിയേറ്റും മണ്ഡലം കമ്മിറ്റിയും ചേര്ന്ന ശേഷമാകും പ്രഖ്യാപനം. ഉത്സവകാലം പരിശോധിച്ച് തെരഞ്ഞെടുപ്പ് പ്രഖ്യാപിക്കേണ്ടതായിരുന്നു.” – വി.എന് വാസവൻ പറഞ്ഞു