തിരുനെല്ലി: തിരഞ്ഞെടുപ്പ് പ്രചാരണവുമായി ബന്ധപ്പെട്ട് വയനാട്ടിലെത്തിയ കോണ്ഗ്രസ് അധ്യക്ഷന് രാഹുല് ഗാന്ധി തിരുനെല്ലി ക്ഷേത്രത്തില് ദര്ശനം നടത്തി. പത്തേ കാലോടെ ക്ഷേത്രത്തിലെത്തിയ അദ്ദേഹം പിതാവ് രാജീവ് ഗാന്ധിക്കുവേണ്ടി ബലിതര്പ്പണവും നടത്തി. രാഹുല് ഗാന്ധിയുടെ സന്ദര്ശനത്തിന്റെ പശ്ചാത്തലത്തില് ക്ഷേത്രത്തിലും പരിസരത്തും ശക്തമായ സുരക്ഷയാണ് ഏര്പ്പെടുത്തിയിരുന്നത്.
ക്ഷേത്ര ദര്ശനത്തിനു ശേഷം മുക്കാല് കിലോമീറ്ററോളം കാല്നടയായി സഞ്ചരിച്ച് അദ്ദേഹം പാപനാശിനിയിലെത്തി. പൂജാരിമാര് ചൊല്ലിക്കൊടുത്ത മന്ത്രം ഏറ്റുചൊല്ലി പിതാവ് രാജീവ് ഗാന്ധിക്കു വേണ്ടി ബലിതര്പ്പണം നടത്തി.തിരികെ ക്ഷേത്രത്തിലെത്തി ദര്ശനം നടത്തി, പ്രസാദം വാങ്ങിയതോടെയാണ് ചടങ്ങുകള് പൂര്ത്തിയായത്.
രാഹുല്ഗാന്ധിയുടെ പിതാവും മുന് പ്രധാനമന്ത്രിയുമായിരുന്ന രാജീവ് ഗാന്ധിയുടെ ചിതാഭസ്മം തിരുനെല്ലി പാപനാശിനിയിലാണ് നിമജ്ജനം ചെയ്തിരുന്നത്.