താനും ഭാര്യ ഉപാസന കൊനിഡേലയും പോകുന്നിടത്തെല്ലാം ഒരു ചെറിയ ക്ഷേത്രമാതൃകയും കയ്യിൽ കരുതാറുണ്ടെന്നു തെലുങ്ക് താരം രാം ചരൺ തേജ വെളിപ്പെടുത്തി. ലോകത്ത് എവിടെയായാലും ജന്മനാടുമായി മാനസികമായ ബന്ധം പുലർത്താനും പ്രാർത്ഥിക്കാനും ഇതിലൂടെ കഴിയുമെന്നും ഓസ്കാറിന് മുന്നോടിയായി അദ്ദേഹം പറഞ്ഞു.
തിങ്കളാഴ്ച്ച നടന്ന 95 മത് ഓസ്കാർ അവാർഡ് ദാന ചടങ്ങിനായി പുറപ്പെടുന്നതിനു മുന്നോടിയായി രാം ചരണും ഭാര്യ ഉപാസന കൊണിഡേലയും അവരുടെ താമസ സ്ഥലത്തിലെ ക്ഷേത്രത്തിൽ പ്രാർത്ഥിക്കുന്ന ചിത്രങ്ങൾ നേരത്തെ വൈറലായിരുന്നു.
ജീവിതത്തിലെ തന്നെ ഏറ്റവും പ്രധാനപ്പെട്ട ദിവസമായതിനാൽ തന്റെ വീടിനുള്ളിലേക്ക് രാം ചരൺ ക്യാമറകൾ അനുവദിച്ചിരുന്നു. ഒരുക്കങ്ങൾ പകർത്തുവാൻ വാനിറ്റി ഫെയർ മാഗസിന്റെ ടീമിനെ നടൻ സ്വാഗതം ചെയ്തിരുന്നു. ഇവരുടെ ക്യാമറ കണ്ണുകളാണ് ക്ഷേത്രത്തിന്റെ മാതൃകയും ഒപ്പിയെടുത്തത്.
ഇന്ത്യൻ ഡിസൈനർമാരായ ശന്തനുവും നിഖിലും രൂപകൽപന ചെയ്ത കറുത്ത നിറത്തിലുള്ള ഇന്ത്യൻ സ്റ്റൈൽ വസ്ത്രവും ഇറ്റലിയിൽ നിന്നും പ്രത്യേകം ഓർഡർ കൊടുത്ത് നിർമ്മിച്ച ഷൂസുമാണ് താരം ഓസ്കാർ വേദിയിൽ ധരിച്ചത് . അദ്ദേഹത്തിന്റെ വസ്ത്രത്തിലെ ബട്ടണുകൾ ഭാരത് ചിഹ്നം പതിച്ച നാണയങ്ങളായിരുന്നു. ആറുമാസം ഗർഭിണിയായ ഉപാസന, ചുവന്ന പൂവുള്ള ഒരു ക്രീം സാരിയാണ് ധരിച്ചിരുന്നത്.