മോസ്‌കോ: റഷ്യ-യുക്രെയ്ൻ യുദ്ധം ആരംഭിച്ചതിനുപിന്നാലെ കനത്ത പ്രതിഷേധമാണ് റഷ്യൻ പ്രസിഡന്റ് വ്ളാഡിമർ പുടിനെതിരെ (Protest Against Russian President) ഉയർന്നുകൊണ്ടിരിക്കുന്നത്. ഇപ്പോഴിതാ യുക്രെയ്‌നിൽ റഷ്യ അധിനിവേശം നടത്തി യുദ്ധം ആരംഭിച്ചതിൽ പ്രതിഷേധിച്ച് ആയിരക്കണക്കിന് റഷ്യൻ പൗരന്മാരാണ് തെരുവിലിറങ്ങിയത്. ഇവരെ റഷ്യൻ ഭരണകൂടം അറസ്റ്റ് ചെയ്ത് നീക്കിയതായാണ് റിപ്പോർട്ട്. യുദ്ധത്തിനെതിരായി സമൂഹമാധ്യമങ്ങളിലൂടെ പൊട്ടിപ്പുറപ്പെട്ട പിന്തുണയും ആഹ്വാനവും പിന്നീട് റഷ്യൻ തെരുവുകളിലേക്ക് എത്തുകയായിരുന്നു.
ആദ്യം നൂറുക്കണക്കിനാളുകൾ അണിനിരന്നെങ്കിൽ പിന്നീടത് ആയിരക്കണക്കിനാളുകളായി മാറി. 53 റഷ്യൻ നഗരങ്ങളിലായി പ്രതിഷേധിച്ച 1,702 പേരെ പോലീസ് അറസ്റ്റ് ചെയ്ത് നീക്കി. ഇതിൽ 940 പ്രതിഷേധക്കാരും തലസ്ഥാന നഗരമായ മോസ്‌കോയിലാണ് അണിനിരന്നത്. 1979-ൽ സോവിയറ്റ് യൂണിയൻ അഫ്ഗാനിസ്ഥാനിൽ നടത്തിയ അധിനിവേശത്തിന് ശേഷം മോസ്‌കോയുടെ ഭാഗത്ത് നിന്നുണ്ടാകുന്ന ഏറ്റവും ആക്രമണോത്സുകമായ നടപടിയെന്നാണ് പ്രതിഷേധക്കാർ വിശേഷിപ്പിച്ചത്. ഇതുമായി ബന്ധപ്പെട്ട് നൂറുക്കണക്കിന് പോസ്റ്ററുകൾ റഷ്യൻ നഗരങ്ങളിൽ പ്രത്യക്ഷപ്പെട്ടു. എന്നാൽ കിഴക്കൻ യുക്രെയ്നിലെ സാധാരണക്കാരെ ‘വംശഹത്യയിൽ’ നിന്ന് സംരക്ഷിക്കുന്നതിനുള്ള ‘പ്രത്യേക സൈനിക നടപടി’യെഎന്നാണ് വ്ളാഡിമർ പുടിൻ വിശദമാക്കിയത്.
