ബ്ലിങ്കിറ്റ്, സ്വിഗ്ഗി, സെപ്റ്റോ ഉൾപ്പെടെയുള്ള ക്വിക്ക് കൊമേഴ്‌സ് പ്ലാറ്റ്‌ഫോമുകളോട് ’10 മിനിറ്റ് ഡെലിവറി’ എന്ന വാഗ്ദാനം പരസ്യങ്ങളിൽ നിന്നും ലേബലുകളിൽ നിന്നും നീക്കം ചെയ്യാൻ കേന്ദ്ര സർക്കാർ നിർദേശം. കേന്ദ്ര തൊഴിൽ മന്ത്രി മൻസുഖ് മാണ്ഡവ്യ സൊമാറ്റോ, സ്വിഗ്ഗി, ബ്ലിങ്കിറ്റ്, സെപ്റ്റോ തുടങ്ങിയ കമ്പനികളുടെ പ്രതിനിധികളുമായി നടത്തിയ കൂടിക്കാഴ്ചയ്ക്ക് പിന്നാലെയാണ് ഈ സുപ്രധാന നീക്കം. അതിവേഗ ഡെലിവറി ലക്ഷ്യമിട്ട് നിരത്തിലിറങ്ങുന്ന ഡെലിവറി പങ്കാളികളുടെ സുരക്ഷ അപകടത്തിലാകുന്നു എന്ന വ്യാപകമായ പരാതിയെത്തുടർന്നാണ് നടപടി.
സർക്കാർ നിർദ്ദേശത്തെത്തുടർന്ന് ബ്ലിങ്കിറ്റ് തങ്ങളുടെ ടാഗ്‌ലൈനിൽ മാറ്റം വരുത്തിക്കഴിഞ്ഞു. “10 മിനിറ്റിനുള്ളിൽ 10,000 ഉൽപ്പന്നങ്ങൾ” എന്നതിന് പകരം “30,000 പ്ലസ് ഉൽപ്പന്നങ്ങൾ നിങ്ങളുടെ പടിവാതിൽക്കൽ” എന്ന രീതിയിലേക്കാണ് മാറ്റം വരുത്തിയത്. നിശ്ചിത സമയപരിധിക്കുള്ളിൽ സാധനങ്ങൾ എത്തിക്കണമെന്ന സമ്മർദ്ദം കുറയ്ക്കുന്നതിലൂടെ റോഡപകടങ്ങൾ ഒഴിവാക്കാനും തൊഴിലാളികളുടെ ക്ഷേമം ഉറപ്പാക്കാനും സാധിക്കുമെന്ന് മന്ത്രാലയം വിലയിരുത്തുന്നു. ഗിഗ് തൊഴിലാളികൾക്കായി മെച്ചപ്പെട്ട വേതനവും സാമൂഹിക സുരക്ഷാ ആനുകൂല്യങ്ങളും ഉറപ്പാക്കണമെന്നാവശ്യപ്പെട്ട് വിവിധ യൂണിയനുകൾ സമരരംഗത്തുണ്ടായിരുന്നു.
പുതിയ തൊഴിൽ നിയമങ്ങൾ പ്രകാരം ഗിഗ് തൊഴിലാളികൾക്കും മിനിമം വേതനം, ആരോഗ്യ പരിരക്ഷ, തൊഴിൽ സുരക്ഷ എന്നിവ ഉറപ്പാക്കുമെന്ന് കേന്ദ്ര സർക്കാർ അറിയിച്ചു. ഈ നിയമങ്ങൾ ഏപ്രിൽ ഒന്ന് മുതൽ നടപ്പിലാക്കാനാണ് സർക്കാർ ലക്ഷ്യമിടുന്നത്. കേന്ദ്രത്തിന്റെ ഈ തീരുമാനത്തെ ആം ആദ്മി പാർട്ടി എംപി രാഘവ് ചദ്ദ ഉൾപ്പെടെയുള്ളവർ സ്വാഗതം ചെയ്തു. ഉപഭോക്താവിന്റെ സ്ക്രീനിൽ മിന്നുന്ന ടൈമറും തൊഴിലാളിയുടെ വസ്ത്രത്തിലെ 10 മിനിറ്റ് എന്ന ബ്രാൻഡിംഗും വലിയ മാനസിക സമ്മർദ്ദമാണ് അവർക്ക് നൽകിയിരുന്നതെന്നും അത് മാറുന്നത് തൊഴിലാളികളുടെ അന്തസ്സ് ഉയർത്തുമെന്നും അദ്ദേഹം അഭിപ്രായപ്പെട്ടു.
