ന്യൂദില്ലി: ഉത്തർപ്രദേശ് നിയമസഭയിൽ സമർപ്പിച്ച സംഭൽ കലാപവുമായി ബന്ധപ്പെട്ട ന്യായിക അന്വേഷണ കമ്മീഷൻ റിപ്പോർട്ടിനെ വിശ്വഹിന്ദു പരിഷത്ത് (വിഎച്ച്പി) സ്വാഗതം ചെയ്തു. റിപ്പോർട്ട് സത്യാവസ്ഥ പുറത്തുകൊണ്ടുവന്നതാണെന്നും, അതിന്റെ അടിസ്ഥാനത്തിൽ കുറ്റക്കാർക്കെതിരെ മാതൃകാപരമായ നിയമനടപടികൾ സ്വീകരിക്കണമെന്നും സംഘടന ആവശ്യപ്പെട്ടു.
വിശ്വഹിന്ദു പരിഷത്തിന്റെ കേന്ദ്ര ജനറൽ സെക്രട്ടറി ഡോ. സുരേന്ദ്ര ജെയിൻ പുറത്തിറക്കിയ പ്രസ്താവനയിലാണ് ഇക്കാര്യം വ്യക്തമാക്കിയത്. രാജ്യത്തിന്റെ ഐക്യത്തിനും ഭരണഘടനാപരമായ സംവിധാനങ്ങൾക്കും എതിരായി പ്രവർത്തിക്കുന്ന ശക്തികളുടെ പങ്ക് റിപ്പോർട്ടിലൂടെ വ്യക്തമാകുന്നുവെന്നാണ് അദ്ദേഹത്തിന്റെ അഭിപ്രായം.
ശാഹി ജാമാ മസ്ജിദിൽ കോടതി ഉത്തരവിന്റെ അടിസ്ഥാനത്തിൽ നടത്തിയ സർവേ തടയാൻ നടന്ന അക്രമം മുൻകൂട്ടി ആസൂത്രണം ചെയ്ത ഗൂഢാലോചനയുടെ ഭാഗമാണെന്ന് അന്വേഷണ കമ്മീഷൻ കണ്ടെത്തിയതായി അദ്ദേഹം അവകാശപ്പെട്ടു. സമാജ്‌വാദി പാർട്ടി എം.പി. സിയാ-ഉർ-റഹ്മാൻ ബർക്ക്, പ്രാദേശിക എം.എൽ.എ. ഇഖ്ബാൽ മഹ്മൂദിന്റെ മകൻ സുഹൈൽ ഇഖ്ബാൽ, ജാമാ മസ്ജിദ് ഇന്തിസാമിയ കമ്മിറ്റി അംഗങ്ങൾ എന്നിവരുടെ പേരുകൾ റിപ്പോർട്ടിൽ പരാമർശിക്കുന്നുണ്ടെന്നും, വ്യാജപ്രചാരണങ്ങളിലൂടെ ജനക്കൂട്ടത്തെ പ്രകോപിപ്പിക്കുകയും അക്രമം സംഘടിപ്പിക്കുകയും ചെയ്തതായി കമ്മീഷൻ കണ്ടെത്തിയിട്ടുണ്ടെന്നും അദ്ദേഹം പറഞ്ഞു.
കലാപത്തിനിടെ കല്ലേറ്, അഗ്നിക്കിരയാക്കൽ, വെടിവയ്പ്, പോലീസിനെതിരായ ആക്രമണം എന്നിവയുണ്ടായതായും, നാല് പേർ കൊല്ലപ്പെടുകയും 28 പോലീസുകാർക്ക് പരിക്കേൽക്കുകയും ചെയ്തതായും റിപ്പോർട്ടിൽ രേഖപ്പെടുത്തിയിട്ടുണ്ടെന്ന് അദ്ദേഹം ചൂണ്ടിക്കാട്ടി. മരിച്ചവരുടെ ശരീരത്തിൽ കണ്ടെത്തിയ വെടിയുണ്ടകൾ പോലീസിന്റേതല്ലെന്നും റിപ്പോർട്ടിൽ വ്യക്തമാക്കിയിട്ടുണ്ടെന്ന് അദ്ദേഹം കൂട്ടിച്ചേർത്തു.
രാജ്യവിരുദ്ധ പ്രവർത്തനങ്ങളിൽ ഏർപ്പെടുന്നവർക്കെതിരെ കർശന നടപടി സ്വീകരിക്കണമെന്നും, റിപ്പോർട്ടിൽ പേരുള്ളവരെയും അവരെ സംരക്ഷിച്ചുവെന്ന് ആരോപിക്കപ്പെടുന്ന രാഷ്ട്രീയ നേതാക്കളെയും നിയമത്തിന് മുന്നിൽ കൊണ്ടുവരണമെന്നും വിശ്വഹിന്ദു പരിഷത്ത് ആവശ്യപ്പെട്ടു. ഇത്തരത്തിലുള്ള സംഭവങ്ങൾ ആവർത്തിക്കാതിരിക്കാൻ മാതൃകാപരമായ ശിക്ഷ ഉറപ്പാക്കണമെന്നും സംഘടന അഭിപ്രായപ്പെട്ടു.
സംഭൽ ഉൾപ്പെടെയുള്ള അതീവസൂക്ഷ്മ മേഖലകളിൽ നിയമ-സമാധാന സംവിധാനം കൂടുതൽ ശക്തിപ്പെടുത്തണമെന്നും, ഹിന്ദുസമൂഹത്തിന്റെ സുരക്ഷയും ആരാധനാലയങ്ങളുടെ സംരക്ഷണവും ഉറപ്പാക്കണമെന്നും പ്രസ്താവനയിൽ ആവശ്യപ്പെട്ടു. കലാപം വ്യാപകമാകുന്നത് തടയാൻ പ്രവർത്തിച്ച പോലീസ്, ഭരണസംവിധാന ഉദ്യോഗസ്ഥരെ അഭിനന്ദിച്ച സംഘടന, അന്വേഷണ റിപ്പോർട്ടിന്റെ അടിസ്ഥാനത്തിൽ കുറ്റക്കാർക്കെതിരെ കർശന നടപടി സ്വീകരിക്കാൻ ഉത്തരപ്രദേശ് സർക്കാർ തയ്യാറാകണമെന്നും ആവശ്യപ്പെട്ടു.
