മനുഷ്യനെ യഥാർത്ഥ മനുഷ്യനായി ജീവിക്കാൻ പ്രാപ്തനാക്കുന്ന മഹത്തായ അറിവാണ് ഭാരതത്തിന്റെ പവിത്രമായ വേദങ്ങൾ പകർന്നുനൽകുന്നതെന്നും, ആ വേദപഠനത്തെ സാധാരണക്കാരിലേക്ക് എത്തിക്കുന്ന ഏറ്റവും വലിയ മനുഷ്യാവകാശ പ്രവർത്തകനാണ് ആചാര്യശ്രീ രാജേഷെന്നും സംസ്ഥാന മനുഷ്യാവകാശ കമ്മീഷൻ ആക്ടിങ് ചെയർമാനും ജുഡീഷ്യൽ അംഗവുമായ കെ. ബൈജുനാഥ് അഭിപ്രായപ്പെട്ടു. കക്കോടി ഒറ്റത്തെങ്ങിലെ വേദമഹാമന്ദിരത്തിൽ നടന്ന കാശ്യപ വേദ റിസർച്ച് ഫൗണ്ടേഷൻ കുലപതി ആചാര്യശ്രീ രാജേഷിന്റെ ജന്മദിനാഘോഷമായ ‘ആചാര്യസുധ’ ഉദ്ഘാടനം ചെയ്യുകയായിരുന്നു അദ്ദേഹം. ചടങ്ങിൽ അധ്യക്ഷത വഹിച്ച കോഴിക്കോട് എം.പി എം.കെ. രാഘവൻ, സമൂഹത്തിന് മാനവികതയുടെ സന്ദേശം പകരുന്ന കാശ്യപ വേദ റിസർച്ച് ഫൗണ്ടേഷനെ ഒരു ഡീംഡ് യൂണിവേഴ്സിറ്റിയായി ഉയർത്തണമെന്ന് നിർദ്ദേശിക്കുകയും ചെയ്തു.
നൂറ്റാണ്ടുകളുടെ തപസ്സിലൂടെ രൂപപ്പെട്ട ഭാരതത്തിന്റെ മഹത്തായ സനാതന സംസ്കാരത്തിന് ലോകമെമ്പാടുമുള്ള നല്ല മൂല്യങ്ങളെ സ്വാംശീകരിക്കാൻ സാധിച്ചിട്ടുണ്ടെന്നും, ആ പാരമ്പര്യത്തിന്റെ നേരവകാശിയാണ് കാശ്യപാശ്രമത്തിന്റെ ഈ വർഷത്തെ കർമ്മശ്രേഷ്ഠ പുരസ്കാരത്തിന് അർഹനായ പ്രവാസി സംരംഭകൻ നസീർ വെളിയിലെന്നും ആചാര്യശ്രീ രാജേഷ് തന്റെ ജന്മദിന സന്ദേശത്തിൽ വ്യക്തമാക്കി. ആചാര്യശ്രീ രാജേഷിന്റെ കാലദേശങ്ങളെ അതിജീവിക്കുന്ന കൃതികളെക്കുറിച്ച് കെ.ജി. രഘുനാഥ് രചിച്ച ‘സുഗന്ധമുള്ള സ്വർണ്ണപ്പൂക്കൾ’ എന്ന പഠനഗ്രന്ഥം ഗോവ മുൻ ഗവർണർ പി.എസ്. ശ്രീധരൻപിള്ള എഴുത്തുകാരൻ സുകുമാരൻ പെരിയച്ചൂരിന് നൽകി പ്രകാശനം ചെയ്തു. എലത്തൂർ എം.എൽ.എ അഡ്വ. വിദ്യാബാലകൃഷ്ണൻ ഉദ്ഘാടനം ചെയ്ത ‘ഹിതകാരിണി’ സേവന പദ്ധതിയുടെ ഭാഗമായി 500 പേർക്ക് ഭക്ഷ്യകിറ്റുകൾ വിതരണം ചെയ്തതിനൊപ്പം, സംസ്ഥാനത്തെ 24 കേന്ദ്രങ്ങളിലായി രണ്ടായിരത്തോളം കിറ്റുകളും രോഗികൾക്കുള്ള വീൽചെയറുകളും ഹോസ്പിറ്റൽ ബെഡുകളും സൗജന്യമായി നൽകാനും തീരുമാനമായി.
കെ.ജി. രഘുനാഥ്, സുകുമാരൻ പെരിയച്ചൂർ, ട്രസ്റ്റി വിവേക് ഡി. ഷേണായ്, ഡയറക്ടർ വേദലക്ഷ്മി എം.ആർ എന്നിവർ പങ്കെടുത്ത ഈ മഹത്തായ സംഗമത്തിലൂടെ ഭാരതീയ പൈതൃകത്തിന്റെയും നിസ്വാർത്ഥമായ സേവനസന്നദ്ധതയുടെയും ഉദാത്തമായ സന്ദേശമാണ് സമൂഹത്തിലേക്ക് പകരുന്നത്. രാഷ്ട്രത്തിന്റെ ആത്മീയവും സാംസ്കാരികവുമായ ഔന്നത്യത്തിന് കരുത്തുപകരുന്ന ഇത്തരം വേദജ്ഞാന പ്രവർത്തനങ്ങൾ വരുംതലമുറയ്ക്ക് വലിയ വഴികാട്ടിയായി മാറുമെന്നതിൽ സംശയമില്ല.

