സൂപ്പർ സാംസൺ !!ദക്ഷിണാഫ്രിക്കയ്‌ക്കെതിരായ മൂന്നാം ഏകദിനത്തിൽ സഞ്ജു സാംസണ് സെഞ്ചുറി ; ഇന്ത്യയ്ക്ക് മെച്ചപ്പെട്ട സ്‌കോർ

പാൾ : മലയാളിത്താരം സഞ്‍ജു സാംസൺ സെഞ്ചുറിയുമായി മിന്നിത്തിളങ്ങിയ ദക്ഷിണാഫ്രിക്കയ്‌ക്കെതിരായ നിർണായകമായ മൂന്നാം ഏകദിനത്തിൽ മെച്ചപ്പെട്ട സ്‌കോർ ഉയർത്തി ഇന്ത്യ. നിശ്ചിത 50 ഓവറിൽ എട്ടു വിക്കറ്റ് നഷ്ടത്തിൽ 296 റൺസാണ് ഇന്ത്യൻ ബാറ്റർമാർ അടിച്ചെടുത്തത്. സഞ്ജുവിന് പുറമെ അർധ സെഞ്ചുറി നേടിയ തിലക് വർമ (77 പന്തിൽ 52), റിങ്കു സിങ് (27 പന്തിൽ 38) എന്നിവരുടെ ബാറ്റിങ്ങും ഇന്ത്യൻ സ്‌കോർ ബോർഡിൽ നിർണായകമായി. നാലാം വിക്കറ്റിൽ സഞ്ജുവും തിലക് വർമയും (77 പന്തിൽ 52) ചേർന്ന് 116 റൺസ് കൂട്ടിച്ചേർത്തു. 114 പന്തിൽ 108 റൺസെടുത്ത സഞ്ജുവിനെ ലിസാർഡ് വില്യംസാണ് പുറത്താക്കിയത്. സഞ്ജുവിന്റെ കന്നി ഏകദിന സെഞ്ചുറിയാണ് ഇന്ന് പിറന്നത്. ഒരു മലയാളി താരം രാജ്യത്തിനായി മൂന്നക്കം തികയ്ക്കുന്നതും ഇതാദ്യമായിട്ടാണ്.

രജത് പാട്ടിദാർ (16 പന്തിൽ 22), സായ് സുദർശൻ (16 പന്തിൽ 10), ക്യാപ്റ്റൻ കെ.എൽ.രാഹുൽ (35 പന്തിൽ 21), അക്ഷർ പട്ടേൽ (3 പന്തിൽ 1), വാഷിങ്ടൻ സുന്ദർ (9 പന്തിൽ 14), അർഷ്‌ദീപ് സിങ് (2 പന്തിൽ 7), ആവേശ് ഖാൻ (2 പന്തിൽ 1) എന്നിങ്ങനെയാണ് മറ്റു ബാറ്റർമാരുടെ സ്കോറുകൾ.