ആലപ്പുഴ: സര്ക്കാര് ജീവനക്കാരുടെ പെന്ഷന് ആനുകൂല്യങ്ങള് വൈകാതെ നല്കാന് പുതിയ സംവിധാനമായി. ആനുകൂല്യങ്ങള് വൈകിക്കുന്നതിലൂടെ സര്ക്കാരിനു പലിശയിനത്തിലുണ്ടാകുന്ന നഷ്ടം ഒഴിവാക്കുകയാണു ലക്ഷ്യം. വിരമിക്കുന്ന ദിവസം തന്നെ ആനുകൂല്യങ്ങള് നല്കാനായി നടപടികള് മൂന്നായി വിഭജിക്കും.
കേസുകളോ അച്ചടക്ക നടപടിയോ നേരിടുന്നവര് ഒഴികെയുള്ളര്ക്കു വിരമിക്കുന്ന ദിവസം തന്നെ പെന്ഷനും കമ്മ്യുട്ടേഷന് ഉള്പ്പെടെ ആനുകൂല്യങ്ങളും അനുവദിച്ച് അക്കൗണ്ടന്റ് ജനറലില് നിന്ന് അനുമതി കിട്ടിയിട്ടുണ്ടെന്ന് മേലധികാരി ഉറപ്പാക്കും. കേസുകളോ അച്ചടക്ക നടപടികളോ ഉള്ളവര്ക്ക് അതില് തീര്പ്പുണ്ടായ ശേഷമേ ആനുകൂല്യങ്ങള് അനുവദിക്കൂ. അതുവരെ താല്ക്കാലിക പെന്ഷന് നല്കും.
ഓരോ വര്ഷവും ജനുവരി 1 മുതലും ജൂലൈ 1 മുതലും, 18 മാസത്തിനകം വിരമിക്കുന്നവരുടെ പട്ടിക ഓഫിസ് മേലധികാരിക്കും പ്രിസം സോഫ്റ്റ്വെയറിലേക്കും നല്കും. പട്ടികയിലുള്ളവര് പെന്ഷന് അപേക്ഷ സമയബന്ധിതമായി നല്കിയിട്ടുണ്ടെന്നും ഉറപ്പാക്കും.
എയ്ഡഡ് സ്ഥാപനങ്ങളിലെ ജീവനക്കാരുടെ പെന്ഷന് ശുപാര്ശ അധ്യയന വര്ഷം കഴിയാന് കാത്തുനില്ക്കാതെ വിരമിക്കല് തീയതിക്ക് 6 മാസം മുന്പ് നല്കിയെന്ന് സ്ഥാപന അധികാരി ഉറപ്പാക്കും.
ജീവനക്കാരന്റെ ഓഫിസ് മാറ്റത്തിന്റെ സമയത്ത് ബാധ്യതയുണ്ടെങ്കില് അവസാന ശമ്പള സര്ട്ടിഫിക്കറ്റില് രേഖപ്പെടുത്തുകയും ഉടന് ഈടാക്കുകയും ചെയ്യും. ജീവനക്കാരന് വിരമിച്ച് ഒരാഴ്ചയ്ക്കുള്ളില് അവസാന ശമ്പള സര്ട്ടിഫിക്കറ്റ് ട്രഷറി ഓഫിസര്ക്കു നല്കും.
