കോവിഡ്-19 വൈറസിനെ പ്രതിരോധിക്കാൻ കേരളത്തിന്റെ അതിർത്തി കടന്നു വരുന്ന ട്രെയിനുകളിലെ യാത്രക്കാരെ പരിശോധിക്കുമെന്ന് മുഖ്യമന്ത്രി പിണറായി വിജയൻ. ഇതിനായി അതിർത്തിയോടു ചേർന്നുള്ള റെയിൽവേ സ്റ്റേഷനുകളിൽ പരിശോധന കാര്യക്ഷമമാക്കും.
കേരളത്തിലെത്തുന്ന ആദ്യ സ്റ്റേഷനിലായിരിക്കും പരിശോധനകൾ നടക്കുക. ഒരു സംഘം രണ്ടു ബോഗി എന്ന നിലയിലായിരിക്കും പരിശോധന നടത്തുകയെന്നും മുഖ്യമന്ത്രി അറിയിച്ചു. റെയിൽവേ സ്റ്റേഷനുകളിലും ചെക്ക് പോസ്റ്റുകളിലും ഡിവൈഎസ്പിമാരുടെ നേതൃത്തിലായിരിക്കും പരിശോധന സംഘങ്ങൾ പ്രവര്ത്തിക്കുക.
ശനിയാഴ്ച അർദ്ധരാത്രി മുതൽ തന്നെ പരിശോധന തുടങ്ങാനാണ് തീരുമാനം. വിമാനത്താവളങ്ങളിൽ എത്തുന്ന അസുഖബാധിതരെ വിമാനത്താവളത്തിന് സമീപം തന്നെ പാർപ്പിക്കാൻ സംവിധാനം ഒരുക്കുമെന്നും മുഖ്യമന്ത്രി പറഞ്ഞു.