സുരേഷ് ഗോപി ചിത്രം കാവൽ തിയേറ്ററുകളിലേക്ക്: റിലീസ് തിയതി പ്രഖ്യാപിച്ചു

മലയാളത്തിലെ ആക്ഷൻ ഹീറോ സുരേഷ് ഗോപിയെ നായകനാക്കി നിഥിൻ രഞ്ജി പണിക്കർ തിരക്കഥയെഴുതി സംവിധാനം ചെയ്യുന്ന കാവലിന്റെ റിലീസ് തിയതി പ്രഖ്യാപിച്ചു. നവംബർ 25 ന് ചിത്രം പ്രേക്ഷകരിലേക്ക് എത്തും. ചിത്രം തിയറ്ററിലാണ് റിലീസ് ചെയ്യുക. പുതിയ പോസ്റ്റർ പുറത്തുവിട്ടുകൊണ്ട് സുരേഷ് ​ഗോപി തന്നെയാണ് റിലീസ് പ്രഖ്യാപിച്ചത്. കാവലിലൂടെ എല്ലാവരേയും തിയറ്ററിലേക്ക് സ്വാ​ഗതം ചെയ്യുന്നു എന്ന കുറിപ്പിലൂടെയാണ് പോസ്റ്റർ പങ്കുവെച്ചിരിക്കുന്നത്.

തമ്പാൻ എന്ന ശക്തമായ കഥാപാത്രമായാണ് സുരേഷ് ഗോപി എത്തുന്നത്. രണ്ട് കാലഘട്ടത്തിലൂടെയാണ് ചിത്രം മുന്നോട്ടു പോകുന്നത്. ആക്ഷനും കുടുംബബന്ധത്തിനും പ്രാധാന്യം നൽകിക്കൊണ്ടുള്ളതാണ് ചിത്രം. രഞ്ജി പണിക്കർ ചിത്രത്തിൽ പ്രധാന കഥാപാത്രമായി എത്തുന്നുണ്ട്. ഹൈറേഞ്ചിന്‍റെ പശ്ചാത്തലത്തിലാണ് കഥ നടക്കുന്നത്.

ഗുഡ്‍വിൽ എന്‍റര്‍ടെയ്‍ന്‍മെന്‍റ്സിന്‍റെ ബാനറിൽ ജോബി ജോർജാണ് ചിത്രം നിർമ്മിച്ചിരിക്കുന്നത്. ഛായാഗ്രഹണം നിഖിൽ എസ് പ്രവീൺ. ബി കെ ഹരി നാരായണന്‍റെ വരികൾക്ക് രഞ്ജിൻ രാജ് ആണ് സംഗീതം. ശങ്കര്‍ രാമകൃഷ്ണന്‍, സുരേഷ് കൃഷ്ണ, പത്മരാജ് രതീഷ്, മുത്തുമണി, അഞ്ജലി നായര്‍, അനിത നായർ, പൗളി വത്സന്‍ ശ്രീജിത്ത് രവി, സാദ്ദിഖ്, രാജേഷ് ശർമ്മ, സന്തോഷ് കീഴാറ്റൂർ, കിച്ചു ടെല്ലസ്, ബിനു പപ്പു തുടങ്ങിയവരും ചിത്രത്തിൽ പ്രധാന കഥാപാത്രമായി എത്തുന്നുണ്ട്.