കൊച്ചി: മോന്‍സണ്‍ കേസില്‍ മുന്‍ ഡിജിപി ലോക്‌നാഥ് ബെഹ്‌റയ്ക്കും എഡിജിപി മനോജ് എബ്രഹാമിനും ഹൈക്കോടതിയുടെ രൂക്ഷ വിമര്‍ശനം. പ്രവാസി വനിത അനിത പുല്ലയിലിന്റെ ക്ഷണപ്രകാരം മുന്‍ ഡി.ജി.പി ലോകനാഥ് ബഹ്‌റയും എ.ഡി.ജി.പി മനോജ് ഏബ്രഹാമും പുരാവസ്തു തട്ടിപ്പുകാരനായ മോന്‍സന്റെ മ്യൂസിയം സന്ദര്‍ശിച്ചത് ആശ്ചര്യപ്പെടുത്തുന്നുവെന്ന് ഹൈക്കോടതി വ്യക്തമാക്കി.
മോന്‍സണ്‍ കേസില്‍ വിശദാംശങ്ങള്‍ മുദ്രവെച്ച കവറില്‍ സമര്‍പ്പിച്ചിട്ടുണ്ടെന്ന് സര്‍ക്കാര്‍ കോടതിയെ അറിച്ചു. സെന്‍സിറ്റീവായ വിവരങ്ങള്‍ ഉള്ളതുകൊണ്ടാണ് മുദ്രവെച്ച കവറില്‍ റിപ്പോര്‍ട്ട് നല്‍കിയതെന്ന് സര്‍ക്കാര്‍ പറഞ്ഞു. കോടതിക്ക് നല്‍കിയ മൂന്ന് കത്തില്‍ ഒന്ന് നോട് ഫയല്‍ ആണെന്ന് സര്‍ക്കാര്‍ കോടതിയെ അറിയിച്ചു.
മോന്‍സന്റെ വീട്ടില്‍ പുരാവസ്തുക്കള്‍ കാണാനാണ് ബെഹ്‌റയെ ക്ഷണിച്ചതെന്ന് സര്‍ക്കാര്‍ പറഞ്ഞു. പ്രവാസി മലയാളി അനിത പുല്ലയില്‍ ക്ഷണിച്ച പ്രകാരമാണ് ബെഹ്‌റ പോയത്. എഡിജിപി മനോജ് എബ്രഹാമിനേയും അനിത പുല്ലയിലാണ് ക്ഷണിച്ചത്. ബെഹ്‌റയുടെയും അനിതയുടെയും മൊഴികളില്‍ ഇത് വ്യക്തമാക്കിയിട്ടുണ്ടെന്നും സര്‍ക്കാര്‍ അറിയിച്ചു.
