ചെന്നൈ: നടി തൃഷയെ കുറിച്ച് നടത്തിയതായി ആരോപിക്കപ്പെടുന്ന വിവാദ പരാമർശത്തെ തുടർന്ന് തമിഴ്നാട് പ്രതിപക്ഷ നേതാവും ഡി.എം.കെ നേതാവുമായ ഉദയനിധി സ്റ്റാലിനെ കസ്റ്റഡിയിലെടുത്ത് പൊലീസ്. സ്ത്രീയെ അപമാനിക്കുന്ന തരത്തിലുള്ളതും അശ്ലീല സൂചനകൾ ഉൾക്കൊള്ളുന്നതുമായ പ്രസ്താവന നടത്തിയെന്ന പരാതിയുടെ അടിസ്ഥാനത്തിലാണ് നടപടി. തഞ്ചാവൂർ പൊലീസാണ് വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തത്. കേസ് രജിസ്റ്റർ ചെയ്തതിന് പിന്നാലെ മുൻകൂർ ജാമ്യം തേടി ഉദയനിധി മദ്രാസ് ഹൈക്കോടതിയെ സമീപിച്ചിരുന്നു. തുടർന്ന് അദ്ദേഹത്തിന്റെ വസതിക്ക് പുറത്ത് പൊലീസ് സുരക്ഷ ശക്തമാക്കുകയും വീട്ടിൽ നിന്നുതന്നെ കസ്റ്റഡിയിലെടുക്കുകയും ചെയ്തു.
ഉദയനിധിയെ കസ്റ്റഡിയിലെടുക്കുന്നതിനിടെ ഡിഎംകെ പ്രവർത്തകർ പ്രതിഷേധവുമായി രംഗത്തെത്തി. പൊലീസ് വാഹനം തടയാൻ ശ്രമിച്ചതോടെ സ്ഥലത്ത് നേരിയ സംഘർഷാവസ്ഥ രൂപപ്പെട്ടു. പൊലീസും പ്രവർത്തകരും തമ്മിൽ ഉന്തുംതള്ളലുണ്ടായതായും റിപ്പോർട്ടുണ്ട്. കാവേരി നദീജല വിഷയവുമായി ബന്ധപ്പെട്ട പ്രതിഷേധ പരിപാടിക്കിടെയായിരുന്നു വിവാദത്തിന് ഇടയായ സംഭവം. കാവേരി വിഷയത്തിൽ മുഖ്യമന്ത്രി സി. ജോസഫ് വിജയ് പ്രതികരിക്കുന്നില്ലെന്നും, ഡി.എം.കെക്കെതിരെ കള്ളക്കേസുകൾ ചുമത്തുന്നതിലാണ് അദ്ദേഹത്തിന്റെ ശ്രദ്ധയെന്നും ഉദയനിധി പ്രസംഗിക്കുന്നതിനിടെ പ്രവർത്തകർ “തൃഷ, തൃഷ” എന്ന് മുദ്രാവാക്യം വിളിച്ചു. ഇതിനെ തുടർന്നാണ് അദ്ദേഹം നടത്തിയ പരാമർശം വിവാദമായത്.
സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ വിവിധ രാഷ്ട്രീയ പാർട്ടികളിൽ നിന്നും ശക്തമായ വിമർശനമുയർന്നു. ടി.വി.കെ നേതാക്കൾ ഉദയനിധി സ്ത്രീകളെ അപമാനിച്ചുവെന്ന് ആരോപിച്ച് പരസ്യമായി മാപ്പ് പറയണമെന്ന് ആവശ്യപ്പെട്ടു. ദേശീയ വനിതാ കമ്മീഷന് പരാതിയും നൽകിയിട്ടുണ്ട്. ടി.വി.കെ നേതാവ് ആധവ് അർജുന്‍, രാഷ്ട്രീയ പ്രസംഗങ്ങളുടെ നിലവാരം താഴ്ത്തുകയും സ്ത്രീകളെ അപമാനിക്കുകയും ചെയ്തുവെന്ന് ആരോപിച്ച് ഉദയനിധിയെ രൂക്ഷമായി വിമർശിച്ചു. ഡി.എം.കെ സ്ഥാപകൻ അണ്ണാദുരൈയുടെ പാരമ്പര്യത്തെ ഇത്തരം പ്രസംഗങ്ങളിലൂടെ തകർക്കുകയാണെന്നും അദ്ദേഹം സമൂഹമാധ്യമ പോസ്റ്റിൽ ആരോപിച്ചു.
ബിജെപി നേതാക്കളും സംഭവത്തിൽ വിമർശനവുമായി രംഗത്തെത്തി. മുൻ സംസ്ഥാന പ്രസിഡന്റ് കെ. അണ്ണാമലൈ ഉദയനിധിയുടെ പ്രസംഗത്തെ പരിഹസിച്ചപ്പോൾ, സംസ്ഥാന വൈസ് പ്രസിഡന്റ് ഖുഷ്ബു സുന്ദർ വിവാദ പരാമർശത്തിന് നിരുപാധികം മാപ്പ് പറയണമെന്ന് ആവശ്യപ്പെട്ടു.
