ആചാര വിഷയങ്ങളിൽ മാറ്റം വരുത്തേണ്ടി വരുന്ന ഘട്ടത്തിൽ പുലർത്തേണ്ട നടപടി ക്രമങ്ങൾ പാലിക്കപ്പെടാത്തതാണ് ഇത്തവണത്തെ ഗുരുവായൂർ ഏകാദശി ഉത്സവം വിവാദത്തിൽ പെടാൻ കാരണമെന്ന് അഖില കേരള തന്ത്രി സമാജം. ഇന്ന് ചേർന്ന സംസ്ഥാന കമ്മറ്റി യോഗത്തിലാണ് ഇത് സംബന്ധിച്ച വിലയിരുത്തലുണ്ടായത്. ഗുരുവായുർ ക്ഷേത്രത്തിൽ ഏകാദശി നാളിൽ ആശൌചം നിലനിൽക്കെ തന്ത്രി ചേന്നാസ് ദിനേശൻ നമ്പൂതിരിപ്പാട് അന്നദാനപ്പുരയിൽ വിളക്ക് കൊളുത്തിയത് ഒഴിവാക്കപ്പെടേണ്ടതായിരുന്നുവെന്നും യോഗം വിലയിരുത്തി.
“ഒരു തന്ത്രി മുഴുവൻ സമൂഹത്തിനും മാതൃകയാകേണ്ട ആളാണ്. അന്നദാനപ്പുര ക്ഷേത്ര മതില്ക്കകത്തിന് പുറത്താണെങ്കിലും, അടുത്ത ബന്ധു മരിച്ച ആശൌചം കണക്കിലെടുത്ത് ഇത്തരം വിവാദങ്ങൾ ഒഴിവാക്കാൻ തന്ത്രി കർശനമായ ജാഗ്രത പുലർത്തേണ്ടതായിരുന്നു. ക്ഷേത്രാചാരങ്ങൾ സംബന്ധിച്ച വിഷയത്തിൽ വിവാദങ്ങൾ ഒഴിവാക്കാൻ തന്ത്രി മറ്റു കുടുംബാംഗങ്ങളെയെല്ലാം പരസ്പര ധാരണയോടെ ഒരുമിച്ച് കൊണ്ടു പോകേണ്ടതുണ്ട്. പാരമ്പര്യ തന്ത്രി സമൂഹം പുലർത്തേണ്ട ഒരു കടമയാണത്.”- തന്ത്രി സമാജം കേന്ദ്ര കമ്മറ്റി അഭിപ്രായപ്പെട്ടു.
അഖില കേരള തന്ത്രി സമാജം സംസ്ഥാന പ്രസിഡന്റ് പുലിയന്നൂർ ശശി നമ്പൂതിരിപ്പാട് അദ്ധ്യക്ഷത വഹിച്ച യോഗത്തിൽ വൈസ് പ്രസിഡന്റ് എ.എ ഭട്ടതിരിപ്പാട്, ജനറൽ സെക്രട്ടറി പുടയൂർ ജയനാരായണൻ നമ്പൂതിരിപ്പാട്, വേഴപ്പറമ്പ് ഈശാനൻ നമ്പൂതിരിപ്പാട്, പുല്ലാംവഴി സനൽ നാരായണൻ നമ്പൂതിരി, ദിലീപ് വാഴുന്നവർ, പെരിഞ്ഞേരി വാസുദേവൻ നമ്പൂതിരി, ഇടക്കഴിപ്പുറം രമേശൻ നമ്പൂതിരി, സൂര്യകാലടി പരമേശ്വരൻ ഭട്ടതിരിപ്പാട്, കെ.പി.സി കൃഷ്ണൻ ഭട്ടതിരിപ്പാട്, പട്ടന്തേയം ശങ്കരൻ നമ്പൂതിരി, കുന്നം ജയകൃഷ്ണൻ നമ്പൂതിരി എന്നിവർ സംസാരിച്ചു.
