Monday, November 16, 2026

ഹൈദരാബാദിലെ പ്രധാന റോഡിന് ‘ഡൊണാൾഡ് ട്രമ്പ് അവന്യൂ’ എന്ന് പേരിട്ട് തെലങ്കാന സർക്കാർ ! ഇന്ത്യ വിരുദ്ധനെന്ന് മുദ്രകുത്തിയിട്ട് ആദരിക്കാൻ നാണമില്ലേയെന്ന് ബിജെപി

ഹൈദരാബാദ്: ഹൈദരാബാദിലെ പ്രധാന റോഡിന് തന്റെ പേര് നൽകിയതിൽ നന്ദി അറിയിച്ച് അമേരിക്കൻ പ്രസിഡന്റ് ഡൊണാൾഡ് ട്രമ്പ്. ഇത്തരമൊരു അപൂർവ്വ ആദരവ് ലഭിക്കുന്ന ചരിത്രത്തിലെ ആദ്യത്തെ യുഎസ് പ്രസിഡന്റാണ് താനെന്ന് അദ്ദേഹം കുറിച്ചു. തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ വഴിയാണ് ട്രമ്പ് ഇന്ത്യയോടുള്ള നന്ദി രേഖപ്പെടുത്തിയത്. അമേരിക്കൻ സ്വാതന്ത്ര്യത്തിന്റെ 250-ാം വാർഷിക ആഘോഷങ്ങളുടെ ഭാഗമായാണ് ഹൈദരാബാദിലെ യുഎസ് കോൺസുലേറ്റിനോട് ചേർന്നുള്ള റോഡ് ‘ഡൊണാൾഡ് ട്രമ്പ് അവന്യൂ’ എന്ന് പുനർനാമകരണം ചെയ്തത്. മൈക്രോസോഫ്റ്റ്, ഗൂഗിൾ, ആമസോൺ തുടങ്ങിയ പ്രമുഖ യുഎസ് ഐടി കമ്പനികളുടെ ഓഫീസുകൾക്ക് സമീപമാണ് ഈ റോഡ് സ്ഥിതി ചെയ്യുന്നത്. അമേരിക്കയോടുള്ള ആദരസൂചകമായാണ് റോഡിന് ട്രമ്പിന്റെ പേര് നൽകിയതെന്നും, യുഎസ്-ഇന്ത്യ ബന്ധത്തിൽ ഹൈദരാബാദിനുള്ള പ്രാധാന്യത്തിന്റെ അടയാളമാണിതെന്നും തെലങ്കാന സർക്കാർ വ്യക്തമാക്കി.

തെലങ്കാന ഉപമുഖ്യമന്ത്രി മല്ലു ഭട്ടി വിക്രമാർകയും യുഎസ് അംബാസഡർ സെർജിയോ ഗോറും ചേർന്ന് റോഡിന്റെ നാമകരണ ഫലകം അനാവരണം ചെയ്യുന്ന ചിത്രം പങ്കുവെച്ചുകൊണ്ടാണ് ട്രമ്പ് തന്റെ സന്തോഷം പങ്കുവെച്ചത്. ഇന്ത്യയിലെ ഹൈദരാബാദിലുള്ള പുതിയ ഡൊണാൾഡ് ട്രമ്പ് അവന്യൂവിലൂടെ ഈ രീതിയിൽ ആദരിക്കപ്പെടുന്ന ആദ്യ യുഎസ് പ്രസിഡന്റാകാൻ കഴിഞ്ഞതിൽ അഭിമാനമുണ്ടെന്ന് അദ്ദേഹം എഴുതി. എന്നാൽ, കോൺഗ്രസ് ഭരിക്കുന്ന തെലങ്കാന സർക്കാരിന്റെ ഈ നീക്കത്തിനെതിരെ ബിജെപി ഉൾപ്പെടെയുള്ള പ്രതിപക്ഷ പാർട്ടികൾ കടുത്ത വിമർശനവുമായി രംഗത്തെത്തിയിട്ടുണ്ട്. ട്രമ്പ് ഇന്ത്യയുടെ താല്പര്യങ്ങൾക്ക് വിരുദ്ധമായി പ്രവർത്തിക്കുന്നുവെന്ന് മുൻപ് ആരോപിച്ച കോൺഗ്രസ് നേതൃത്വം, ഇപ്പോൾ അദ്ദേഹത്തെ ആദരിക്കുന്നത് ശുദ്ധ കാപട്യമാണെന്ന് ബിജെപി കുറ്റപ്പെടുത്തി.

അതേസമയം, അന്താരാഷ്ട്ര തലത്തിൽ നഗരത്തിന് കൂടുതൽ ശ്രദ്ധ നേടാനും അമേരിക്കൻ നിക്ഷേപങ്ങൾ ആകർഷിക്കാനുമുള്ള തന്ത്രപരമായ ശ്രമങ്ങളുടെ ഭാഗമായാണ് ഈ നടപടിയെന്ന് തെലങ്കാനയിലെ ഭരണകക്ഷി വ്യക്തമാക്കി. നയതന്ത്ര തലത്തിലും സാങ്കേതിക വിദ്യാരംഗത്തും യുഎസുമായുള്ള ബന്ധം ദൃഢമാക്കാൻ ഈ നീക്കം സഹായിക്കുമെന്നാണ് വിലയിരുത്തൽ. എങ്കിലും, ആഗോള നേതാക്കളുടെ പേരിടലുമായി ബന്ധപ്പെട്ട് ഉയർന്നുവന്ന ഈ തർക്കം തെലങ്കാനയിൽ പുതിയൊരു രാഷ്ട്രീയ വാദപ്രതിവാദത്തിന് വഴിതുറന്നിരിക്കുകയാണ്.

Related Articles

Latest Articles