പുതിയ അന്തരീക്ഷത്തിൽ വന്നിട്ട് 20 ദിവസം; അരികെ മറ്റൊരു ആനക്കൂട്ടം, സാഹചര്യവുമായി അരിക്കൊമ്പൻ ഇണങ്ങിച്ചേർന്നുവെന്ന് വനം വകുപ്പ്

ചെന്നൈ: അരിക്കൊമ്പൻ പുതിയ സ്ഥലത്ത് വന്നിട്ട് 20 ദിവസങ്ങൾ പിന്നിടുമ്പോൾ ആന ആരോഗ്യവാനാണെന്നും പുതിയ സ്ഥലവുമായി ആന ഇണങ്ങിച്ചേർന്നുവെന്നും വനംവകുപ്പ് വ്യക്തമാക്കി. കളക്കാട് മുണ്ടൻതുറൈ കടുവാസങ്കേതത്തിൽ കോതയാറിൽ പുല്ലെല്ലാം തിന്ന് ഉഷാറായി നിൽക്കുന്ന അരിക്കൊമ്പന്‍റെ ദൃശ്യങ്ങളാണ് തമിഴ്നാട് വനം വകുപ്പ് പുറത്ത് വിട്ടത്.

ഇടുക്കിയിലെ ചിന്നക്കനാലിൽ ആഴ്ചയിൽ ഒരിക്കലെങ്കിലും അരിക്കൊമ്പൻ ജനവാസമേഖലയിലെത്തുമായിരുന്നു. തീറ്റകുറയുന്ന വേനൽക്കാലം ഒന്നിടവിട്ട ദിവസം വരെ അരി തിന്നാന്‍ കൊമ്പന്‍ നാട്ടിലെത്തുമായിരുന്നു. അവിടുന്ന് മയക്കുവെടി വെച്ച് പിടികൂടി, പെരിയാറിൽ കൊണ്ടുവിട്ടപ്പോഴും അരിക്കൊമ്പന്‍, ഒരാഴ്ചയ്ക്കുള്ളിൽ നടന്നുനടന്ന് മേഘമലയിലെ എസ്റ്റേറ്റിൽ ഇറങ്ങി. നമ്മൾ വരച്ച അതിർത്തിയെല്ലാം ചാടിച്ചാടിക്കടന്ന് കുമളിയിലെ വീട്ടുമുറ്റത്തെത്തി. അവിടുന്നും നടന്ന് കമ്പത്തിറങ്ങി.എന്നാൽ കമ്പത്ത് നിന്ന് മയക്കുവെടി കൊണ്ട് തെക്കോട്ടിറങ്ങി കളക്കാടെത്തിയപ്പോൾ അരിക്കൊമ്പൻ ആകെ മാറുകയാണ്