തിരുവനന്തപുരം : പുരുഷ ശരീര സൗന്ദര്യ മത്സരത്തിലെ വിജയികള്ക്ക് ആംഡ് പോലീസ് ഇൻസ്പെക്ടർമാരായി നിയമനം നൽകാനുള്ള സർക്കാർ നീക്കം തകർന്നു. അന്താരാഷ്ട്ര ബോഡി ബിൽഡിങ് ചാംപ്യൻഷിപ്പിൽ വിജയിച്ച ചിത്തരേഷ് നടേശനും ലോക പുരുഷ സൗന്ദര്യ മത്സരത്തിൽ വെള്ളി മെഡൽ നേടിയ ഷിനു ചൊവ്വയ്ക്കും നിയമനം നൽകാനുള്ള മന്ത്രിസഭാ തീരുമാനമാണ് പരാജയപ്പെട്ടത്. ഷിനു ചൊവ്വ പോലീസിന്റെ കായിക ക്ഷമത പരീക്ഷയിൽ തോറ്റു.100 മീറ്റര് ഓട്ടം, ലോങ് ജംപ്, ഹൈജംപ്, 1500 മീറ്റര് ഓട്ടം എന്നിവയിലാണ് പരാജയപ്പെച്ചത്.അതേസമയം ചിത്തരേഷ് നടേശൻ പങ്കെടുത്തില്ല.
ഒളിമ്പിക്സിലും ദേശീയ ഗെയിംസിലും അംഗീകരിച്ചിട്ടുള്ള കായിക ഇനങ്ങളിൽ മെഡലുകള് നേടിയ താരങ്ങള്ക്ക് സ്പോര്ട്സ് ക്വാട്ടയിൽ പോലീസിൽ നിയമനം നൽകുന്നത് കാലങ്ങളായുള്ള കീഴ്വഴക്കമാണ്. ഇത് പൊളിച്ചെഴുതിയാണ് മന്ത്രിസഭാ തിരുമാനമെടുത്തത്. ദേശീയ അന്തർ ദേശീയ തലത്തിൽ രണ്ടുപേരുമുണ്ടാക്കിയ നേട്ടവും പശ്ചാത്തലത്തവും പരിഗണിച്ച് നിയമനം നൽകുന്നവെന്നായിരുന്നു ഉത്തരവ്. ചട്ടങ്ങളിൽ ഇളവ് വരുത്തി സൂപ്പർന്യൂമറി തസ്തിക സൃഷ്ടിച്ചാണ് നിയമനം നൽകാൻ നീക്കം നടന്നത്. അന്തർദേശീയ- ദേശീയ തലങ്ങളിൽ മെഡലുകള് കരസ്ഥമാക്കിയ താരങ്ങള് നിയമനത്തിനായി കാത്തുനിൽക്കുമ്പോഴാണ് ചട്ടവിരുദ്ധ നിയമന നീക്കം നടന്നത്.
