റിയാദ് : വിമാനത്താവളങ്ങള്‍ക്കും വിശുദ്ധ നഗരങ്ങള്‍ക്കും നേരെ ആക്രമണം നടത്തുന്ന ഹൂതികള്‍ വലിയ പ്രത്യാഘാതം നേരിടേണ്ടി വരുമെന്ന് സൗദി മന്ത്രിസഭാ യോഗത്തിന്റെ മുന്നറിയിപ്പ്. രാജ്യത്തിന്റെ സുരക്ഷ കര്‍ശനമായി ഉറപ്പാക്കുമെന്നും അന്താരാഷ്ട്ര കപ്പല്‍ ഗതാഗതത്തിന് ഭീഷണി ഉയര്‍ത്താന്‍ ആരെയും അനുവദിക്കില്ലെന്നും റിയാദില്‍ ചേര്‍ന്ന യോഗത്തില്‍ സൗദി വ്യക്തമാക്കി. കിരീടാവകാശിയും പ്രധാനമന്ത്രിയുമായ അമീര്‍ മുഹമ്മദ് ബിന്‍ സല്‍മാന്റെ അധ്യക്ഷതയിലാണ് യോഗം ചേര്‍ന്നത്.
മക്കയ്ക്കും മദീനയ്ക്കും വിമാനത്താവളങ്ങള്‍ക്കും സിവിലിയന്‍ കേന്ദ്രങ്ങള്‍ക്കും നേരെ നടക്കുന്ന ആക്രമണങ്ങള്‍ സൗഹൃദ രാജ്യങ്ങളുടെ സഹകരണത്തോടെ പൂര്‍ണ്ണമായി ചെറുക്കുമെന്ന് മന്ത്രിസഭ വ്യക്തമാക്കി. ചെങ്കടലിലൂടെയുള്ള കപ്പല്‍ ഗതാഗതത്തിന് ഭീഷണി സൃഷ്ടിക്കാന്‍ ആരെയും അനുവദിക്കില്ലെന്നും യോഗം മുന്നറിയിപ്പ് നല്‍കി. രാജ്യത്തിന്റെ അതിര്‍ത്തികള്‍ സംരക്ഷിക്കുന്ന സൗദി സൈന്യത്തെയും യെമനില്‍ പ്രവര്‍ത്തിക്കുന്ന സഖ്യസേനയെയും മന്ത്രിസഭ അഭിനന്ദിച്ചു.
ഇതിനിടെ, ആക്രമണത്തിന് ഇരയായ ‘ഈസ്റ്റ്-വെസ്റ്റ്’ എണ്ണ പൈപ്പ് ലൈനിലെ എണ്ണ വിതരണം അതിവേഗം പുനഃസ്ഥാപിക്കാന്‍ കഴിഞ്ഞതായി മന്ത്രിസഭ വിലയിരുത്തി. സൗദി ഊര്‍ജ്ജ മേഖലയുടെ ഉയര്‍ന്ന പ്രതിരോധ ശേഷിയാണ് ഇത് വ്യക്തമാക്കുന്നതെന്നും യോഗം ചൂണ്ടിക്കാട്ടി.
