വാഷിംഗ്ടൺ : അമേരിക്കൻ ഭരണകൂടം റഷ്യൻ കൂലിപ്പടയാളി ഗ്രൂപ്പായ വാഗ്നറിനെ ഒരു അന്താരാഷ്ട്ര ക്രിമിനൽ സംഘടനയായി പ്രഖ്യാപിച്ചു . വൈറ്റ് ഹൗസ് ദേശീയ സുരക്ഷാ വക്താവ് ജോൺ കിർബി വാഗ്നർ വ്യാപകമായ അതിക്രമങ്ങളും മനുഷ്യാവകാശ ലംഘനങ്ങളും നടത്തുന്നുവെന്ന് ആരോപിച്ചു. വാഗ്നറിന് ഉക്രെയ്നിൽ ഏകദേശം 50,000 പോരാളികളുണ്ടെന്നും അവരിൽ 80 ശതമാനവും ജയിലുകളിൽ വിവിധ കുറ്റങ്ങൾക്കായി തടവ് ശിക്ഷ അനുഭവിച്ച തടവു പുള്ളികളായിരുന്നുവെന്നും കിർബി പറഞ്ഞു.
യുക്രൈനിലെ യുദ്ധത്തിനായി വാഗ്നറിന് ഉത്തരകൊറിയ ആയുധങ്ങൾ വിതരണം ചെയ്യുന്നതായി കിർബി ആരോപിച്ചു. ഉത്തരകൊറിയയിൽ നിന്നുള്ള ആയുധ കൈമാറ്റം യുഎൻ സുരക്ഷാ കൗൺസിലിന്റെ പ്രമേയങ്ങളുടെ നേരിട്ടുള്ള ലംഘനമാണെന്നും അദ്ദേഹം പറഞ്ഞു.
യുക്രൈനിലെ റഷ്യയുടെ ആക്രമണത്തിന്റെ തുടക്കം മുതൽ, വാഗ്നറുടെ മേധാവി യെവ്ജെനി പ്രിഗോജിൻ, കിഴക്കൻ യുക്രൈൻ നഗരമായ ബഖ്മുത്തിലേക്കുള്ള റഷ്യൻ മുന്നേറ്റങ്ങളുടെ ക്രെഡിറ്റ് അവകാശപ്പെട്ടു മുന്നോട്ടു വന്നിരുന്നു.
