തൃശൂര്: കാലാവസ്ഥ അനുകൂലമായാൽ മാറ്റിവെച്ച തൃശ്ശൂര് പൂരം വെടിക്കെട്ട് ഇന്ന് വൈകിട്ട് നടത്തും. കനത്ത മഴയെത്തുടര്ന്നാണ് 11 ന് പുലര്ച്ചെ നടക്കേണ്ട വെടിക്കെട്ട് മാറ്റിവച്ചത്. ഇന്നലെ വൈകിട്ട് തൃശ്ശൂരില് മഴ പെയ്യാതിരുന്നതോടെയാണ് ഇന്ന് വൈകിട്ട് നടത്താന് ദേവസ്വങ്ങളുമായി കൂടിയാലോചിച്ച് ജില്ലാ ഭരണകൂടം ധാരണയായത്.
ചൊവ്വാഴ്ച കുടമാറ്റം നടക്കുമ്പോള് മുതല് തൃശൂര് നഗരത്തില് ചെറിയ മഴയുണ്ടായിരുന്നു. വൈകിട്ടോടെ മഴ കനത്തു. മഴ തുടര്ന്നതോടെയാണ് വെടിക്കെട്ട് നടത്താനാകാതെ നീണ്ടുപോയത്. അടുത്തവര്ഷം ഏപ്രില്30 നാണ് പൂരം നടക്കുകയെന്ന പ്രഖ്യാപനവും വന്നിട്ടുണ്ട്. പകല്പ്പൂരം മെയ് 1 ന് നടക്കും. പൂര വിളംബരം ഏപ്രില് 29നായിരിക്കുമെന്നും അറിയിപ്പുണ്ട്.
പൂരത്തിന്റെ ചടങ്ങുകള് പൂര്ത്തിയായ സാഹചര്യത്തില് പകല് വെടിക്കെട്ടടക്കം മെയ് 11 ന് നടന്നിരുന്നു. അന്ന് മഴയില്ലാത്തതാണ് പകല് വെടിക്കെട്ട് നടത്താന് സാധിച്ചത്. പാറമേക്കാവിന്റെ വെടിക്കെട്ടായിരുന്നു ആദ്യം നടന്നത്. തുടര്ന്ന് തിരുവമ്പാടിയുടെ വെടിക്കെട്ടും നടന്നു. അന്ന് ഉച്ച തിരിഞ്ഞ് രണ്ടരയോടെയാണ് പകല് വെടിക്കെട്ട് പൂര്ത്തിയായത്. എന്നാല് കനത്ത മഴയെ തുടര്ന്ന് എല്ലാവരും കാത്തിരുന്ന വൈകിട്ടത്തെ തൃശ്ശൂര് പൂരം വെടിക്കെട്ട് മാറ്റി വെക്കേണ്ടി വരികയായിരുന്നു.
അതേസമയം, തൃശൂര്പൂരം വെടിക്കെട്ട് കാണാന് വലിയ സജ്ജീകരണമാണ് അധികൃതര് ഒരുക്കിയിരുന്നത്. നേരത്തെ തൃശൂര് പൂരം വെടിക്കെട്ട് കാണാനുള്ള നിയന്ത്രണം വലിയ തോതില് ആശങ്കയുളവാക്കിയിരുന്നു. പിന്നീട് പൊലീസും ദേവസ്വം അധികൃതരും സര്ക്കാര് പ്രതിനിധികളും തമ്മില് ചര്ച്ച നടത്തി പരിഹാരം കാണുകയായിരുന്നു. സ്വരാജ് റൗണ്ടില് കാണികളെ അനുവദിക്കില്ലെന്നായിരുന്നു അധികൃതരുടെ നിലപാട്. ഈ സാഹചര്യത്തില് സ്വരാജ് റൗണ്ടിലെ കെട്ടിടങ്ങള്ക്ക് മുകളില് നിന്ന് വെടിക്കെട്ട് കാണാനുള്ള അവസരം ഒരുക്കിയിരുന്നു.

