കൊച്ചി: ആഡംബര ടൂറിസ്റ്റ് ബസുകള്‍ ആക്രി വിലയ്ക്ക് തൂക്കിവില്‍ക്കാനിട്ട് ഉടമ. ഒരു ബസിന് കിലോ 45 രൂപയ്ക്കാണ് റോയല്‍ ട്രാവല്‍സ് ഉടമ റോയ്സണ് ജോസഫ് വില്‍ക്കാനിട്ടിരിക്കുന്നത്. കോവിഡ് (Covid) നിയന്ത്രണങ്ങള്‍ വഴിമുട്ടിച്ചതോടെ സര്‍വ്വീസുകള്‍ കുറഞ്ഞതും മാറി മാറി വരുന്ന കോവിഡ് നിയന്ത്രണങ്ങള്‍ ഉപജീവനമാര്‍ഗം മുട്ടിച്ചതോടെ കടക്കെണിയിലായെന്നും ജീവിക്കാന്‍ ഇനി മറ്റു മാര്‍ഗമില്ലാത്തതുകൊണ്ടാണ് ബസ്സുകള്‍ വില്‍ക്കുന്നതെന്നും റോയ്സണ് പറയുന്നു.
വായ്പാ കുടിശിക താങ്ങാനാവാതെ മുന്‍പുണ്ടായിരുന്ന 20 ബസുകളില്‍ പത്തെണ്ണം ഇതിനോടകം തന്നെ വിറ്റെന്നും, ബാക്കിയുള്ള ബസുകളില്‍ മൂന്നെണ്ണമാണ് ഇരുമ്പ് വിലയ്ക്ക് വില്‍ക്കാന്‍ പോകുന്നതെന്നും അദ്ദേഹം കൂട്ടിച്ചേര്‍ക്കുന്നു. 44,000 രൂപ ടാക്‌സും 80,000 രൂപ ഇന്‍ഷുറന്‍സുമെടുത്താണ് ഓരോ ബസും റോഡിലിറങ്ങാന്‍ ക്ലിയറന്‍സ് പാസാവുന്നതെന്നും സ്ഥിരമായി പാക്കേജ് ടൂര്‍ ഓടിക്കൊണ്ടിരുന്ന അവസ്ഥയില്‍ നിന്നും കേരളത്തിലെ ടൂറിസ്റ്റ് കേന്ദ്രങ്ങള്‍ അടച്ചിട്ടതോടെയാണ് വരുമാനം മുടങ്ങിയതെന്നും റോയ്സണ് വ്യക്തമാക്കുന്നു.
