ചെന്നൈ : ലക്നൗ സൂപ്പർ ജയന്റ്സിനെതിരായ ഐപിഎൽ മത്സരത്തിൽ ലക്നൗ പേസർ മാർക്ക് വുഡിനെതിരെ ചെന്നൈ സൂപ്പർ കിങ്സ് നായകൻ മഹേന്ദ്ര സിങ് ധോണി ഇരട്ട സിക്സർ പറത്തിയതിന് പിന്നാലെ സമൂഹ മാദ്ധ്യമങ്ങളിൽ ചിരിയുണർത്തി മുൻ ഇന്ത്യൻ താരം ഗൗതം ഗംഭീറിന്റെ മുഖഭാവം. നിലവിൽ ലക്നൗ സൂപ്പർ ജയന്റ്സിന്റെ മെന്റർ കൂടിയായ ഗംഭീർ, മത്സരം നടക്കുമ്പോൾ സ്റ്റേഡിയത്തിലുണ്ടായിരുന്നു. മത്സരത്തിൽ ചെന്നൈയ്ക്കെതിരെ ലക്നൗ 12 റൺസിന്റെ തോൽവി വഴങ്ങിയതോടെ ഗംഭീറിനെതിരായ ട്രോളുകൾ തരംഗമാവുകയാണ്.
2011ൽ ഇന്ത്യ ഏകദിന ലോകകപ്പ് നേടിയപ്പോൾ അന്ന് ശ്രീലങ്കയ്‌ക്കെതിരായ ഫൈനലിൽ ധോണി നേടിയ സിക്സറിന് അമിത പ്രാധാന്യം നൽകുന്നതായി ഗംഭീർ പലതവണ അഭിപ്രായപ്പെട്ടിരുന്നു. അന്ന് ഇന്ത്യൻ ടീമിന്റെ ഓപ്പണറായിരുന്ന ഗംഭീറിന്റെ 97 റൺസ് ഇന്ത്യൻ വിജയത്തിന്റെ നട്ടെല്ലായിരുന്നു. ഈ പശ്ചാത്തലത്തിലാണ്ധോണി നേടിയ സിക്സറുകളോടുള്ള ഗംഭീറിന്റെ പ്രതികരണം സമൂഹ മാദ്ധ്യമങ്ങളിൽ വൈറലായത്.
