ലാഹോർ : നിരോധിത ഭീകരസംഘടനയായ ലഷ്കർ-ഇ-തൊയ്ബയുടെ സ്ഥാപക നേതാവും മുഖ്യ ആസൂത്രകനുമായ അമീർ ഹംസയ്ക്ക് ലാഹോറിൽ വെടിയേറ്റു. ആക്രമണത്തിൽ മാരകമായി പരിക്കേറ്റ ഇയാളെ പാകിസ്താൻ ചാരസംഘടനയായ ഐഎസ്ഐയുടെ അതീവ സുരക്ഷയിൽ സൈനിക ആശുപത്രിയിലേക്ക് മാറ്റി. അമേരിക്ക ആഗോള ഭീകരനായി പ്രഖ്യാപിച്ച അമീർ ഹംസയുടെ നില അതീവ ഗുരുതരമാണെന്നാണ് പുറത്തുവരുന്ന റിപ്പോർട്ടുകൾ. തന്റെ വസതിയിൽ വെച്ചാണ് ഇയാൾക്ക് നേരെ ആക്രമണം ഉണ്ടായത്.
2005-ലെ ബെംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ഭീകരാക്രമണത്തിന്റെ മുഖ്യ ആസൂത്രകരിലൊരാളായി ഇന്ത്യ കരുതുന്ന വ്യക്തിയാണ് അമീർ ഹംസ. ഹാഫിസ് സയീദിന്റെ വലംകൈ ആയി അറിയപ്പെടുന്ന ഇയാൾ, ലഷ്കർ-ഇ-തൊയ്ബയുടെ രൂപീകരണത്തിലും ഭീകരവാദ ആശയങ്ങൾ പ്രചരിപ്പിക്കുന്നതിലും നിർണ്ണായക പങ്കുവഹിച്ചിട്ടുണ്ട്. 2012-ലാണ് അമേരിക്ക ഇയാളെ ആഗോള ഭീകരരുടെ പട്ടികയിൽ ഉൾപ്പെടുത്തിയത്. ലാഹോറിലെ സൈനിക ആശുപത്രിയിൽ ഐ.എസ്.ഐയുടെ കനത്ത കാവലിലാണ് ഇയാൾ ഇപ്പോൾ ചികിത്സയിൽ കഴിയുന്നത്.
പാകിസ്ഥാനിലെ വിവിധ ഭീകരസംഘടന നേതാക്കളെ ലക്ഷ്യമിട്ട് അടുത്ത കാലത്തുണ്ടായ ‘അജ്ഞാത തോക്കുധാരികളുടെ’ ആക്രമണങ്ങളുടെ തുടർച്ചയായാണ് ഈ സംഭവത്തെയും സുരക്ഷാ വിദഗ്ധർ കാണുന്നത്. കഴിഞ്ഞയാഴ്ച സിന്ധിൽ വെച്ച് മറ്റൊരു ലഷ്കർ നേതാവായ സെയ്ഫുള്ള ഖാലിദ് വെടിയേറ്റു കൊല്ലപ്പെട്ടിരുന്നു. ഇത്തരം ആക്രമണങ്ങൾ പാകിസ്താനിലെ ഭീകരശൃംഖലകൾക്കുള്ളിലെ ആഭ്യന്തര തർക്കങ്ങളുടെ ഫലമാണോ അതോ മറ്റ് ഏജൻസികളുടെ ഇടപെടലാണോ എന്നതിൽ ദുരൂഹത തുടരുകയാണ്. മുതിർന്ന ഭീകര നേതാക്കൾ ഒന്നിനുപുറകെ ഒന്നായി ആക്രമിക്കപ്പെടുന്നത് പാക് മണ്ണിലെ ഭീകരവാദ ശൃംഖലയ്ക്ക് വലിയ തിരിച്ചടിയായി മാറിയിരിക്കുകയാണ്.
