മനുഷ്യരാശി ഒന്നടങ്കം അറിയാൻ താൽപര്യപ്പെടുന്ന വിഷയങ്ങളിലൊന്നാണ് പറക്കും തളികകളുടെയും അന്യഗ്രഹ ജീവികളുടെയും പിന്നിലെ സത്യം. നിരവധി വാദങ്ങൾ ഈ വിഷയത്തിൽ പറയപ്പെടുന്നുണ്ടെങ്കിലും ലോകരാജ്യങ്ങളിലെ ഒരു സർക്കാർ പോലും ഔദ്യോഗികമായി ഈ വിഷയത്തിൽ പ്രതികരിച്ചിട്ടില്ല.
എന്നാൽ ഈ വിഷയത്തിൽ കുറേകൂടി വ്യക്തത വരുത്തി രംഗത്തെത്തിയിരിക്കുകയാണ് അമേരിക്കൻ നാവിക സേനാ അധികൃതർ. നാവികസേനയുടെ പക്കൽ നിന്ന് ചോർന്ന മൂന്ന് വീഡിയോ ക്ലിപ്പുകളാണ് വിഷയം. പറക്കും തളികകളെ നേരിട്ട് കണ്ട അമേരിക്കന് യുദ്ധവിമാനങ്ങളില് നിന്നുള്ള ദൃശ്യങ്ങളാണ് ചോര്ന്നത്. ഈ ക്ലിപ്പുകള് സത്യമാണെന്ന് സ്ഥിരീകരിച്ചിരിക്കുകയാണ് നാവികസേന അധികൃതര്. വ്യാജദൃശ്യങ്ങളല്ല ഇതെന്ന് അര്ത്ഥം.
2007ലും 2015ലുമായി എടുത്തതാണ് ഈ വീഡിയോ. ഇത് സത്യമാണെങ്കിലും പൊതുജനങ്ങള്ക്ക് ലഭിക്കാന് പാടില്ലാത്തതായിരുന്നുവെന്നാണ് അമേരിക്കന് നാവികസേനയുടെ ഡെപ്യൂട്ടി ചീഫ് ഓഫ് ഓപ്പറേഷന്സ് ആയ ജോസഫ് ഗ്രാഡിഷര് മാധ്യമങ്ങളോട് പറഞ്ഞത്. യുദ്ധവിമാനത്തിന്റെ ഇന്ഫ്രാറെഡ് ക്യാമറയിലാണ് നേവിയുടെ ഭാഷയിലെ അജ്ഞാത പറക്കുംയന്ത്രങ്ങള് പതിഞ്ഞത്. വളരെ വേഗത്തില് ചലിക്കുകയും പെട്ടെന്ന് അപ്രത്യക്ഷമാവുകയും ചെയ്തു ഇവയെല്ലാം.
