വെങ്ങാനൂർ :വെങ്ങാനൂർ മേക്കുംകര ശ്രീനീലകേശി ക്ഷേത്രത്തിലെ പറണേറ്റ് മഹോത്സവത്തിന്റെ ഭാഗമായി ഏർപ്പെടുത്തിയ ശ്രീനീലകേശിയമ്മ അശ്വതി പുരസ്ക്കാരം വാവ സുരേഷിന് സമർപ്പിച്ചു.ക്ഷേത്രമുറ്റത്തു നടന്ന ചടങ്ങിൽ കേരളാ ഗവർണർ ആരിഫ് മുഹമ്മദ് ഖാനാണ് സുരേഷിന് പുരസ്ക്കാരം നൽകിയത് .പാമ്പുകളുടെ സംരക്ഷണത്തിനായി സ്വ ജീവിതം ഉഴിഞ്ഞു വച്ച പ്രവർത്തന മികവിനാണ് വാവ സുരേഷിനെ പുരസ്‌ക്കാരത്തിന് അർഹനാക്കിയത് .
വിഷുദിനമായ വെള്ളിയാഴ്ച വൈകുന്നേരം ക്ഷേത്രസന്നിധിയിൽ എത്തിയ ഗവർണർ ആരിഫ് മുഹമ്മദ് ഖാനെ ക്ഷേത്ര ഭാരവാഹികൾ പൂർണ്ണ കുംഭം നൽകി സ്വീകരിച്ചു .ചടങ്ങിൽ മുൻ ഹൈകോടതി ചീഫ് ജസ്റ്റിസ് എം ആർ ഹരിഹരൻ നായർ ,നീലകേശി ക്ഷേത്ര പ്രസിഡന്റ് ജെ രവിചന്ദ്രൻ ,സെക്രട്ടറി അനൂപ് എസ് കെ ,വൈസ് പ്രസിഡന്റ് ആർ ജെ അനിൽകുമാർ ,ട്രഷറർ വി ഗോപകുമാരൻ നായർ തുടങ്ങിയവർ സന്നിഹിതരായിരുന്നു .
വെങ്ങാനൂർ മേക്കുംകര ശ്രീനീലകേശി ക്ഷേത്രത്തിൽ ആറു വർഷത്തിൽ ഒരിക്കൽ നടത്തി വരാറുള്ള പറണേറ്റ് ഉത്സവത്തിന്റെ ഏറ്റവും പ്രധാനചടങ്ങായ പറണേറ്റ് ഈ വരുന്ന ഏപ്രിൽ 22 നാണ് നടക്കുക .തുടർന്ന് 23 ന് നിലത്തിൽപോരും നടക്കും .
